Mizoramin kalphung thar a mamawh - ZPM President

ZPM president Lalliansawta chuan, Mizoramin intodelhna turin kalphung thar a mamawh thu a sawi a; corruption case lian pui pui pawh CBI chhui phalna Mizoram sorkarin a pe ngam lo nia lang chu ṭha lo a tih thu a sawi bawk.

Nimina ZPM Southern Hqrs pisaa inkhawmah thu sawiin Lalliansawta chuan, Mizoramah lui tui ṭha tak a awm laiin kawlphethaah a pachhe hle si niin a sawi a, “Congress leh MNF-ten min hruai tlut tlut a, hmasawnna hmuh tur a váng hle. Kan ram intodelhna tur hian kalphung thar kan mamawh. Kalphung hian mihring a thunun avangin kalphung thar hnuaiah chuan system ṭhain hmasawnna min thlen dawn a ni,” a ti.

Lalliansawta chuan, “Mipui sum hi renchem tak leh dik taka hman tur a ni a, party sorkar ta a ni lo tih kan hre tur a ni. Corruption case lian pui pui pawh CBI chhui phalna Mizoram sorkar hian a pe ngam lo nia langte hi a fuh lo hle a ni,” a ti a; Mizoramin ṭhenawm state dangte a ûm pha lo ṭan hle tih a sawi.

ZPM President chuan, ZPM chu kum li lek a upa a nih thu sawiin, inthlan an hmachhawn tawhah chet ṭhat ṭum te, chet ṭhat vak lohte an nei tih a sawi a, “Keimahni lam pawh inenfiah kan ṭul. Che ṭha chho zel ta ila, awm dan thiam loh pawh a hlauhawm thei a ni,” a ti.