Aibawk khua cashless area-ah puang

Mizoram Rural Bank chuan MRB Aibawk Branch hmalaknain Aibawk khua chu cashless area-ah an puang a; December 2, Ningani tlai khan MRB chairman V Jaya Chandra leh assistant general manager C Sangpu Vaiphei-te hoin puanzarna inkhawm hman a ni.

Aibawk khua cashless area-a puannaah hian khawtlang hruaitute leh sorkar pisa aiawhte bakah, Phulpui, Sateek, Tachhip leh Maubuang VC president-te an tel a; MRB Chairman chuan Aibawk damdawi-in (PHC) hnenah inverter leh printer a hlan nghal a ni.

Aibawk khaw chhungah hian thil lei tur leh bill pe duhte’n pawisa faia pe loin, online payment hmangin an ti thei tawh dawn niin MRB hotute chuan an sawi a; cashless area-a puanna inkhawm zawhah kal khawmte chuan online transaction hmangin chawhmeh zuarte thlai zawrhte an lei nghal a ni.