Lunglei Civil Hospital laboratory RTPCR atan mithiamte'n enfiah

Nimin khan Health & Family Welfare department-in a thlan expert team-te chuan Civil Hospital, Lungleia RTPCR dahna tur ruahman an tlawh a, a dinhmun leh hmalak dan tur an enfiah.

Team member-te chu Dr H Lalhlenmawia (RIPANS), Prof. John Zothanzauva (Mizoram University) leh Dr Vanramliana (PUC)-te an ni.

Expert team-te chuan, RTPCR dahna atana ruahman pindan pathum ruakte chu a ṭhat tâwk thu an sawi a, "Awm lo aṭanga bul ṭan tur kan nih avangin a kháwl chah chhung mai bakah, laboratory a nih dan tura puahchah chhungin hun a duh deuh ang. Kháwl man leh a behbàwm lei nan cheng nuai 100 chu a lo berah a ṭul ang," an ti.

Lunglei Civil Hospital-a RTPCR laboratory puitling din a nih theihna atan Health minister Dr R Lalthang­liana chuan Indian Council of Medical Research (ICMR), New Delhi hotute vawi eng emaw zat a dàwr tawh thu expert team member-te chuan an sawi. Expert team hian an report chu vawiinah sorkarah an thehlut nghal dawn a ni.