Mizoram State Lottery tihtawp a ni

Mizoram sorkar chuan Mizoram State Lottery kalpui mek chu July 10, Thawhlehni khan a titawp. Lottery tihtawpna thupek hi Finance department chuan a chhuah a ni.

Tarlan tawh angin, MNF party chuan Mizoram State Lottery kalpui danah thil dik lo a awm nia hriain, July 9, Thawhṭanni aṭang khan Institutional Finance & State Lottery directorate-a thawktute pisa kai tur an dang ṭan a, Thawhlehniah pawh khan an dang leh bawk.

Finance department-in order a chhuah danin, lottery draw chu tun dinhmunah a taka kalpui theih a nih loh avangin distributor leh selling agent-te'n Mizoram State Lottery an draw zawng zawng chu July 10 aṭangin suspend a nih thu a tarlang.

Mizoram State Lottery hnuaiah hian distributor pali an awm a; paper lottery chu Teesta Distributors-in a buaipui a, online lottery pathum chu Summit Online Trade Solution, NV International leh Ecool Gaming Solution ten an kalpui thung a ni.

MNF party-in July 9 aṭanga Institutional Finance & State Lottery directorate-a thawkte pisa kai tur an dan ṭan chu July 10-ah pawh zing dar 9 aṭang an chhunzawm leh a, thil duhawm lo thleng a awm lo a, police ṭhahnem an duty a ni. MNF-te hi MNYF president Lalrinawma, MLA-in a ho a ni.

June 9 khan MNF Senior Vice President chuan Mizo Hnam Rûnah thuthar thehdarhtute kâwmin, lottery kalpui mek chu tihtawp ngei an phût thu a sawi a, "Kum 2008-a Congress sorkar a pian aṭangin lottery hi duhsak zawngte nena sam inphiarzawm nan kan CM Lal Thanhawla hian a hmang ṭangkai hle a, a duhsak bik vai sumdawngte'n duh tâwkin vawiin thlengin an chalâi mawlh mawlh a ni," a ti.

Tawnluia chuan, lottery aṭangin Mizoram sorkar sum báwma lut a tlem hle laiin, sorkar hotu mi tlemtêin an hlawkpui hle thung tih sawiin, "Lottery-a thil dik lo inphûm leh siamṭha tura sorkar phût nan MNF chuan vawi nga press conference koin kan puang chhuak tawh," a ti a; chuti chung chuan Chief Minister-in maimitchhíng chungin lottery sum a la hâi buan buan zel tho niin a sawi.

Hetihlai hian, MPCC-a Communication department chuan thuchhuah siamin, MNF-te chuan an party chhung buai thupbona atan lottery-ah issue an zawng niin an tarlang.

MPCC chuan tunhnaiah MNF party chu an chhungkua an inhruipawh nasa hle nia sawiin, "Lamṭang awma an inbeih avangin, an hruaitu pawimawhte social media-ah hial an inbei chhuak a ni. Hei hi thupbo dan ngaihtuahin rem leh rem loin issue siam tur an zawngin kum 2015 a an lo sawi nial nual tawh state lottery an buaipui thar leh mai a ni tih hi mipuiin hria ila kan duh," an ti a, rem leh rem loa Mizoram sorkar beiah MNF hruaitu ṭhenkhatte an puh.

MNF sorkar laiin lottery chungchangah chief minister Zoramthanga a hmingchhe hle nia sawiin MPCC chuan, "Gauhati High Court-in direction a pe hial a ni. Hetiang hi a nih avangin Pu Zoramthanga a CM hun laia vai company uchuak taka a lo duhsak tawhna, MNF lottery scam kha mipuiin an hriat chhuah thar phah beiseiin MNF hruaitu lawk, Pu Zorama duh lotute'n hma an laa hriat a ni," an ti.

MPCC chuan, Mizoram State Lottery thlan danah tender chhángtu, a hmu ve lote lungawi lo chu High Court-ah zualkoin, an hlawhchham niin an sawi a, "Competition Commission of India-ah an zualko leh a, hetah pawh hian an hlawhchham leh a ni," an ti a; lottery chungchanga High Court-a kalte chu MNF sorkar laia an duhsakte niin an sawi.