Aii Pûk chungchanga Zoramthanga Thubuai ngaihtuah hun sawn
Aii Pûk chungchanga chief minister hlui leh MNF president ni lai Zoramthanga thubuai chu nimin kha Aizawl District & Sessions Court-a Special Court-in a ngaihtuah hun a ni a; mahse, case Investigating Officer (IO) damlohna vanga a inlan theih loh avangin thubuai ngaihtuah hun sawn a ni.
Sorkar ukilte hnen aṭanga thu dawn danin, Aii Pûk thubuaiah hian thubuai chhuitu Anti Corruption Bureau (ACB) chuan thuhretu 30 vel an nei a, thuhretu 20 vel thu zawhfiah a ni tawh. Nimin khan Case IO chu thu zawhfiah tura koh a ni a, mahse, a damloh avangin a inlan thei lo a, a inlan theih hun tur hriat a ni lo. Case IO hian stroke vangin harsatna a tâwk mek a ni.
Ruahman dan chuan, Case IO chu thu la zawhfiah tur a ni a, thuhretu thu la zawhfiah lohte thu zawhfiah chhunzawm kher a ngaih dawn leh ngaih dawn loh chungchangah Court-in thutlukna a siam ang.
Zoramthanga hi PRISM chuan MNF term hnihna tawp lamah Aii Pûka a huan hungna atana sorkar thil hmangah leh a hlawh leh a thil neih inmil loah puhin, ACB-ah FIR an thehlut a, mahse, ACB chuan chhui zui tlakah a ngai lo. Congress sorkar hnuah Gauhati High Court chuan ngenna an hmuh angin, kum 2010 khan Aii Puk chungchang chhui turin ACB a hriattir a ni.
Thubuai pahnih hi kal kawp ni mah se, nimin bikah chuan Aii Puk thubuai chungchang ngaihtuah tur a ni a; hlawh leh thil neih inmil lo chungchangah pawh thuhretu eng emaw zat thu zawhfiah an ni tawh bawk.