Ni 17 chhung sikul pakua khâr tawh Zirlai 850 velin zirna chawlhsan mek

Mizoram Government Lumpsum Grant-in-Aid Higher Secondary School Association (MIGLAHSSA) leh lumpsum higher secondary school (HSS) awmnaa Managing Board-te'n adhoc grant-in-aid dinhmuna hlángkai tura sorkar an phût vanga June 18, 2018 aṭanga sikul an khar chu an la chhunzawm zel a; nimin thleng khan state holiday tel loin ni 17 chhung sikul an khâr tawh.

Tarlan tawh angin, MIGLAHSSA leh School Managing Board-te chuan adhoc aided-a hlânkai phût hian June 18, 2018 aṭangin tiam chin awm loin sikul an khâr ṭan a, sorkar aṭanga thu lawmawm an la hmuh loh avangin an la khâr zui zel a ni. Sikul khâr hma hian Demand Day an lo hmang tawh bakah, sikul khâr hnu, June 27 khan lumpsum aided school pakuaa zirlaite chuan an khua ṭheuhah adhoc aided-a hlankai an duhzia leh zirna chhunzawm tawh an duhzia an lantir tawh bawk.

MIGLAHSSA hruaitute hnen aṭanga thu dawn danin, sikul an khâr hnuah hian an thil phût chungchangah hian lumpsum aided HSS pakuate awmna khuaa khawtlang hruaitute chuan an bialtu MLA-te an dàwr tawh hlawm. School Education minister H Rohluna bial NE Khawdungsei khawtlang hruaitute pawhin minister hi hmuh an tum a, mahse, minister H Rohluna hian 'Nuar ka be ngai lo,' tiin a lo chháng niin an sawi.

Lumpsum aided school awmna dang, Thingsulthliah khawtlang hruaitute pawhin bialtu MLA R Lalzirliana, Home minister an dàwr tawh a, Minister hian an thil duhte chu tihpuitlin dan a awm em, tiin lehkha a ziahsak a; mahse, School Education Minister-in a lo hnâwlsak niin an sawi bawk.

Mizoramah lumpsum grant-in-aid HSS pakua a awm mek a; chu'ngte chu - Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawlnuam HSS-te a ni. Heng sikul pakuaah hian zirlai 850 vel an awm a ni.