Bunghmunah chenna in 10 ṭhiat tawh

Kumin June thla tìr lama ruahsur nasa vanga huam zau taka lei a khîkna, Lunglei district-a Bunghmun khuaah lei khì vanga luah ngam loh chenna in 10 ṭhiah a ni tawh.

Bunghmun Branch YMA president Lalmuan­awma sawi danin, Bunghmun V/C leh YMA hmalaknain lei khì huam chhunga chenna in pali chu July 2, 2018 khan ṭhiah a ni a, July 9-10 khan in dang paruk ṭhiah leh a ni. A bâk ṭhiah ṭul awm theite chu, lei khîk zel dan azira hmalak turin ruahmanna an siam bawk.

June thla tir lama ruahsur nasa vangin Bunghmun khuaah hian Dinthar Vengah metre 100 vela zauin lei a khi a, khawlaia kawngpuite pawh a khi tel a; lei khi vang hian biak-in pahnih, middle school pakhat, anganwadi pakhat leh chenna in 28 chu dinhmun hlauhawmah a awm a ni.

Bunghmun YMA chuan lei khì vanga harsatna tawk chhung­kuate category pathumah an ṭhen a, chu'ng mite hnenah chuan hmun hrang hrang aṭanga ṭanpuina an dawn Rs. 1,59,000 chu an sem tawh a ni. Category-I hnuaiah chhungkaw pakua awmin, Rs. 8,000 ṭheuh an pe a, category-II ah chhungkaw paruk awmin, Rs. 6,000 ṭheuh an pe a, category-III hnuaia chhungkaw 17 hnenah Rs. 3,000 ṭheuh an pe bawk.