KHAWTHLIR

Award sem dawn
Rokunga Memorial Society chuan vawiin chawhnu hian Synod Conference Centre-ah Rokunga Award 2018 an sem dawn. Award dawng tura tehfung lian ber chu, ‘Mizo zepui, tlawmngaihna, huaisenna, taimakna, rinawmna leh tawrhchhelnate nunpuitu a ni tur a ni’ tih a ni a; kum thum dana sem tura ruahman a ni.

Tanpuina sem
Labour Union of Mizoram, Serchhip district hmalaknain Serchhipa Mizoram Building and Other Constructions Workers Welfare Board (MBOCWWB)-a inziak lut mi 610 hnenah nimin khan educational assistance Rs. 12,20,000 sem a ni. Suma n sem bakah hian, MBOCWWB awareness campaign an nei nghal bawk.

MNF V/C ding
MNF sub-headquarters, Lunglei chuan thuchhuah siamin, Lunglei Ramthar Venga Congress kaihhruai village council-a President-in Congress party bànsana MNF a zawm avangin Lunglei Ramthar Vengah nimin khan MNF V/C a ding niin an tarlang. MNF chuan, "Mizoramah Congress party rin tâwk lohna leh Congress chhuahsan hri a lêng mek a ni," an ti.

TCC pantu mi 690
National Tobacco Control Programme, Mizoram hnuaia vaihlo zûk leh hmuam sim duhte puitu, Tobacco Cessation Clinic (TCC) hrang hrangaa mite chu June 2018 chhung khan mi 690-in an pan a, chu'ng zinga 21.29% chuan zûk leh hmuam an sim. TCC hi district hrang hrangah 10 a awm a ni.

Legal awareness
MJA general headquarters leh Mizoram State Legal Services Authority chuan vawiin chhun dar 12 hian Aizawl Press Club-ah dan zirhona, legal awareness programme an buatsaih dawn. He hunah hian MJA gen.hqrs. member-te bakah, district danga MJA member, Aizawla awm remchangte chu tel vek tura beisei an ni.