Brick leh balua inhriatthiam loh thuah Kolasib leh Cachar thuneitute inkâwm

Kolasib district leh Assam-a Cachar district-a thuneitute leh, a kaihhnawih pawl hruaitute chu July 10, Thawhlehni khan Vairengte SDO(C) pisaah an ṭhu khawm a; tun hnaia balu leh leirawhchan (brick) man chung­changa inhriatthiam lohna thleng vanga Kolasib district leh Cachar district, Assam chhunga harsatna thlengte chinfel dan tur an sawiho.

Meeting-ah hian Kolasib district aṭanga telte chu district bawrh­sap Dr Arun T leh SP Abhisek Dhania ten an ho a; Cachar lam chu bawrhsap Dr Lakshmanan leh SP Rakesh Roushan ten an ho thung. District pahnihte hian harsatna an tawh dante an sawi hnuah thutlukna an siam a ni.

Meeting-a thurelte

1. Cachar-a balu leh brick man tur chu hetiang hian rem siam a ni - balu cubic metre khatah Rs. 900, brick first class pakhat man Rs. 10. Rate thar hi July 2018 chhung hman phawt tur a ni a, a ṭul dan azirin thla khat hnuah ennawn a ni ang. A man ennawn a nih dawn chuan Cachar lam chauh ni loin, Mizoram Tipper Association hruai­tute pawh ràwn tel tur a ni.

2. Raju Lashkar chuan mahaldar a nih loh thu a sawi a, mahaldar chu Naseeruddin Laskar a nih thu a tarlang. Cachar DC chuan, dan loa mahal man an awm a nih chuan an chungah dan lekkawh a nih tur thu a sawi.

3. National Highway 54 chu eng motor tan pawh him taka kaltlang a nih theih nan eng motor tan mah dan tawh lo ni se. Mizoram leh Cachar lam mi tan pawh him leh thlamuang takin zin veivakin sumdawnna kalpui se.

4. Mahalder-in mahalder hming, telephone number leh balu leh brick rate an tarlang vek tur a ni a, Mizo tan a to bik tur a ni lo. Mizo leh non-Mizo tan rate a inang vek tur a ni.

5. Cachar huam chhunga harsatna tâwk Mizote tan border magistrate Deep Moy Thakuria phone no. 8133979963 leh Dholai Police Station OC, SI Bhaskar phone no. 9101246137-ah biak theih a ni.

6. Remna leh muanna a awm zel theih nan tu pawhin harsatna siam lo se.