ZPM CM Candidate-ah beisei sang

Zoram Peoples' Movement (ZPM) thupuangtu Vanlalhlana, MPC senior vice president chuan, ZPM Chief Ministerial Candidate chu kohhran leh Pathian ṭih mi, eirûkna laka fihlim a nih avangin ZPM kalphung hmangin Mizoram chu state chhuanawm takah a hruai an beisei thu a sawi.

Vanlalhlana hian July 10, Thawhlehni khan Bawngkawn South-a ZPM Steering Committee dinna inkhawmah thu sawiin, India rama state chief minister ṭha tak tekte'n an state tan ro tling tam tak an hnutchhiah thu a sawi a, "Keini chu kum 30 chuang kan CM neihte pahnih erawh mipuiin kan sit hle. ZPM CM Candidate erawh kohhran leh Pathian ṭih mi, eirûkna laka fihlim a ni a, ZPM kalphung hmangin state chhuanawm takah min hruai kan beisei tlat a ni," a ti.

Vanlalhlana chuan, "Ring lo mite pawhin term 4/5 an sorkar theih chuan, kohhran hruaitu leh ram hmangaihtu hruaina hnuaiah ZPM hian term tam tak sorkar kan inbeisei a, tunah hian keimahni theihna leh hmalakna piah lamah mipui an inhawng em em a ni," a ti a; hmun tinah ZPM boruak a sang zel niin a sawi.

Mizorama sorkarna chelh tawhtu party-te chu mipui hmasawnna aia an party ngai pawimawh ṭhinah puhin Vanlal­hlana chuan, tlâk hlau takin ro an rél ṭhin tih a sawi a, "MIP leh NLUP hmanga kan thlen chin hre reng mah se, vote hmuhna tur a nih chuan an chhunzawm lui tlat a. Tuna bial 40-ah cheng nuai 400 ṭheuh an hmangte hi hmasawnna an ngaih pawimawh tak tak lohzia a tichiang. Cheng nuai 16,000 hi hmasawnna hna thawhna tham a ni a, eng hmasawnna nge a thlen kan en reng dawn a ni," a ti.

ZPM Spokesman chuan, chief minister Lal Thanhawla'n, 'Sawhthing lei dan min hrilh rawh se' a tih chungchangah, "State páwn aṭanga bawng leh vawkte to tak taka lei dan thiam hi tual­chhung sawhthing lei dan kan hrilh a ngaih ka ring lo," a ti a; "Thlai chi to uchuak taka lei te, contract revise estimate sang tak tak siamte hi ZPM chuan ram hmangaihna avangin kan thiam ve lo ang" a ti bawk.