Hlawh neiin IAS coaching class a kal theih dawn - MYC Chairman

Mizoram Youth Commission (MYC) chairman Joseph Lalhimpuia, MLA chuan, Mizo ṭhalai hlawhtlin tum tak takte tan IAS online coaching a thlawna kal theih a nih bakah, hlawh a neih theih dawn tih a sawi.

Joseph Lalhimpuia hian nimin khan a pisaah thuthar thehdarhtu ṭhenkhatte a kâwm a; chief minister Lal Thanhawla'n Mizo ṭhalaite'n Civil Service Examination-a hlawhtlinna nei tura an inbuatsaihna atan cheng nuai 120 a pek thu sawiin, "Hei bakah hian IAS online coaching atana kan thawhpui Alternative Learning System (ALS) chuan corporate social responsibility (CSR) aṭangin Mizo ṭhalaite'n online coaching atan hian cheng nuai 170.74 an thawh a ni," a ti.

MYC Chairman sawi danin, MYC leh ALS ṭangkawpin Aizawl leh Lungleiah online-in IAS coaching class an kalpui dawn a, a senso chu MYC-in 75% tumin, 25% chu coaching class-a kal turte'n an tum a ngai thung. July 21, 2018-ah Aizawl leh Lungleiah IAS Coaching Scholarship Examination buatsaih a ni dawn a, tih ṭhat dan azirin ALS-in CSR aṭanga an sum thawh hmangin a thlawna an zirtir bakah, incentive pe thei dawn a ni.

Joseph Lalhimpuia chuan, kumin hi MYC chuan 'Mizo ṭhalaite sipaia luh rûnpui kum' atan an puan thu sawiin, "Mizo ṭhalaite sipaia tam zawk an luh theihna turin MYC chuan district khawpui tinah sipaia ṭang duhte tana inbuatsaihna tur a buatsaih dawn a ni," a ti.