July 11 khan rannung seh natna vei Thenzawlah mi 22 hmuh chhuah a ni

Thenzawl khuaah rannung seh natna, scrub typhus a lèn mek avangin Health &Family Welfare department chuan nimin khan Thenzawl Joint YMA Hall-ah a thlawna inentirna an buatsaih. He free clinic-a mi 203 an enfiah zinga mi 22-in rannung seh natna an kai tih an hmu chhuak.

Thenzawla Vantawng chanchinbu editor Liantluanga Renthlei hnen aṭanga thu dawn danin, scrub typhus vanga free clinic-ah hian Thenzawl damdawi-in (CHC) leh AYUSH Hospital-a doctor-te an ṭhu a, mi 370 an inentir. Inentir mi 370 zinga mi 203 chu scrub typhus an kai leh kai loh enfiah a ni a, mi 22-in an kai tih hmuh chhuah a ni. Scrub typhus vei hmuh chhuahte chu a thlawna damdawi pek an nih bakah, inenkawl dan tur zirtir an ni.

Integrated Diseas Surveilance Programme (IDSP) state nodal officer Dr Pachuau Lalmalsawma leh a hote chuan July 10, Thawhlehni zan khan Thenzawl Joint YMA Hall-ah scrub typhus awareness campaign an buatsaih a, Thenzawl Joint YMA president RC Lalrintluanga'n a kaihruai. Dr Pachuau Lalmalsawma leh IDSP state entomologist Lalfakzuala Pautu ten rannung seh natna chungchanga mipui hriat tur pawimawhte an sawi a ni.

Tarlan tawh angin, Thenzawlah hian kuminah rannung seh natna vangin mi pahnih an thi tawh a, tun hnaiah a hluar zuala hriat a ni. January aṭanga July 10 thleng khan rannung seh natna vei Thenzawl CHC-ah mi 80 leh AYUSH Hospital-ah mi 31 hmuh tawh a ni.