Joint NGO-in Bru hruai kîr ṭha an ti ; Bru-te'n kîr turte dawn ang dawn an phût
NGO Coordination Committee (Joint NGO) hruaitute nimina Central YMA committee room-a ṭhukhawm chuan, Tripura relief camp-a Bru-te Mizorama an lêt theihna atana inremna siam a ni chu ṭha an ti a, Mizoram inthlan kaihhnawih thil reng reng erawh Mizoram páwna tih erawh an remti lo tih an tarlang. Meeting-ah hian, Mizorama Bru awmsate'n refugee camp-a Bru awmte dawn ang dawn ve an phût thu tarlan a ni.
Meeting kaihruaitu, CYMA president Vanlalruata chuan, Joint NGO-te'n May 28, 2018-ah Election Commission of India (ECI) hotute an hmun thu sawiin, "An intiam ang ngeia refugee camp-a Bru-te an camp-a vote thlaktìr lo tur leh Mizorama rawn kîr an duh chuan harsatna kan thlen loh turte kan thlen a, kan thu thlen hi Ministry of Home Affairs hotute hnenah pawh kan pe a ni. A reaction a ṭhaah kan ngai," a ti.
CYMA President sawi danin, Bru-te Mizorama an lêtna tura sorkar laipui, Mizoram sorkar, Tripura sorkar leh Mizoram Bru Displaced People Forum (MBDPF)-te'n inremna an siam hmain Mizoram sorkar official leh Mizorama Election department hotute koin, thil pawimawh an sawipui leh a ni.
Report petu Lalhmachhuana, CYMA general secretary chuan, relief camp-a Bru-te'n Mizorama hruaik kîr tura ruahmanna siam vek a nih hnu leh Mizoram NGO-te pawhin kîr tura an duh laiin, February 6, 2017-ah Supreme Court-ah petition an thehluh thu a sawi a, "Petition hi a tawp ta nge, an ti tawp dawn. Inremna siam an duh leh mai thei hi, an dawn turah an lungawi ta pawh a ni thei," a ti.
Lalhmachhuana sawi danin, Bru relief camp aṭanga Mizorama kîr tawhte'n tuna refugee camp-a awm mekte dawn tura ruahman zatve pawh an dawng lo a; refugee camp-a Bru-te dawn ang dawn ve tura ngenna sorkar laipuiah an thlen mek a ni.
Relief camp-a Bru-te chu Mizoramah an kîr a nih chuan kum thum hnua lak chhuak turin Rs. 4,00,000 pek an ni dawn a; in sakna tur Rs. 1,50,000, kum hnih chhung thla tin Rs. 5,000, kum hnih chhung a thlawnin ration pek an nih dawn bakah, an awmna hmun tura an kalna senso zawng zawng sorkarin a tumsak dawn a ni.
Joint NGO meeting chuan, "Tripura transit camp-a awm Tuikukte Mizorama an awmna hmun ṭheuh lo let tura tih hi ṭha kan ti. Mizoram khua leh tui dik tak, kum 1995 Electoral Roll-a chuangte leh an thlah kal zel, Tripura camp-a awm mekte'n Mizorama lêt duh tak takna rilru pú a, sorkar nena ruahmanna ṭha tak siam a ni thei ta hi lawmawm kan ti a, inremna ang ngeia an lo let pawh kan beisei a ni," an ti.
Inremna anga Mizorama an kîr hnua Tripura-a relief camp parukte khâr hlen tura ruahmanna awm pawh lawmawm an tih thu tarlangin Joint NGO chuan, "Sorkar ruahmannate thláwp tlat turin Mizo mipuite pawh kan beisei a ni," an ti a; chutih rualin, inthlan kaihhnawih thil reng reng erawh chu Mizoram páwna kalpui an remti ngai dawn lo tih an tarlang bawk.