R Zaikunga hnenah Rokunga Award hlan

Rokunga Memorial Society (RMS) chuan nimin khan Synod Conference Centre-ah Rokunga Award 2018 hlanna inkhawm an buatsaih a; award hi R Zaikunga, Lunglei Lunglawn hnenah an hlan. RMS hian award hi kum thum dana pek ṭhin an tum.

Award chungchang sawifiahtu RMS treasurer Vanneihtluanga chuan, award hi ṭhangthar zel zingah Mizo nunze mawi chhawm nun a nih theih nana buatsaih an nih thu sawiin, "Award dawng tur thlang tur YMA chu phungbawmah sawm niin, chawimawi tlak nia hriat mi 12 hming dawn a ni a, dik taka a dawngtu tur thlan a nih theihna atan thlangtu zingah RMS-a tel ve lo mi pali leh RMS aiawh mi pakhat ruat an ni," a ti.

Rokunga Award 2018 hi R Zai­kunga hnenah hian RKS chair­man Lalfakzuala, IAS (Rtd.) leh Award Selection Commi­ttee chairman, prof. R Lalthantluangate'n an hlan. Award hian tangkapui, thuchei leh Rs. 50,000 a keng tel a, hengte hi Vanglaini chanchinbuin an tum a ni.

Rokunga Award dawng tura teh­fung lian ber chu, 'Mizo ze pui, tlawmngaihna, huaisenna, taimakna, rinawmna leh tawrhchhel­nate nunpuitu a ni tur a ni,' tih a ni.

Award dawngtu chu mihring dam lai ngei a ni tur a ni a, award dawng tura thlan tawh hnua a thi a nih erawh chuan award pek tho tur a ni. Award dawngtu chu kum 50 aia upa a nih a ngai a; award dawngtu chu award dawn hnuah a nungchangin zir lohna eng emaw a neih chuan award chu chhuhsak theih a ni ang.

Nimina Rokunga Award hlan tak R Zaikunga hi January, 1953-ah Tarpho khuaah a piang a, kum 1963-ah tuna an chenna Lunglawnah an pem a ni. Zirna lamah chuan pawl 10 a pass-a, primary school-ah zirtirtu hna a thawk ṭhin. Khawtlangah chhiat tawk an awmin a thleng hmasa pawl a ni ziah a, tlangval a nih lai aṭanga kum 2015 thleng khan a dam a nih chuan mitthi lumennaah a kal ziah ṭhin a, thlan pawh kumin thleng hian a la lai ziah a, khawhar inah pawh a riak ziah a ni.