In pathum sak tur lungphùm phúm

New Secretariat Complex-a sorkarin in pathum a sak thar tur lungphùm chu nimin khan UDPA minister Zodintluanga'n New Secretariat Complex-ah a phúm. In sak thar turte chu - Aizawl Convention Centre (ACC), Administrative Training Institute (ATI) car parking leh Multi-Level Car Parking (MLCP)-te a ni.

UDPA Minister chuan, Mizoramin hma a sawn zel avangin Central leh India ram páwn aṭangin khual ṭha, mi pawimawh tak takte leh official pawimawh tak tak tlawhtu an awm zel tih sawiin, "Thlenna chungchangah harsatna kan tawh mai bakah, VVIP, VIP leh mi pawimawhte leh an ṭhuihruaite nen Aizawl khawpui kawngpui lûn takah an inzui cháng hian mipuiin harsatna tam tak kan tâwk ṭhin a ni," a ti.

Mipui náwlpui khawsak phung tibuai loa sorkar khualṭhate leh anmahni zuitute zawng zawng dâwl zo thlenna ṭha leh official meeting neih theih nghalna tur hmun sorkarin a siam duhna a rei tawh tih sawiin Zodintluanga chuan, "Chu ngaihtuahna aṭang chuan ACC leh MLCP-te hi a lo piang a ni," a ti a; MLCP chu Secretariat dawrtute leh thawktute tan a ṭangkai tur thu a sawi.

Aizawl Convention Centre hi Special Plan Assistance aṭanga sum hmuh cheng nuai 2499.99 sénga sak tur a ni a, chhawng ngaa sak tum a ni. Ground floor-ah lobby, emergency care unit, seminar room (mi 150 ṭhut theihna), convention centre office, restaurant, VIP lounge, rest room, coffee shop, emporium, information & banking facilities, quarters, parking, etc. a awm ang.

First floor-ah board room, lecture hall, lounge, VIP lounge, deluxe room 12 a awm dawn a; second floor-ah auditorium, food stall, VIP lounge leh suite room patuk a awm ang. Third floor-ah auditorium (mi 432 ṭhut theihna), lounge, VIP lounge, suite room paruk awmin, basement floor-ah parking, store room, service area, gymnasium, etc. a awm dawn thung.

ATI car parking hi NEDP aṭanga sum pek cheng nuai 140 hmang sak tur a ni a, thla 12 chhunga sak zawh tur niin, chawng thuma sak a ni ang. Car 26, two wheeler eng emaw zat leh bus pahnih leng tura ruahman a ni.

Multi Level Car Parking chu NLCPR sum cheng nuai 3,601 senga sak tur a ni a, thla 24 chhunga sak zawh tur a ni. Chhawng kuaa sak tur a ni a, car 351 leh two wheeler 224 dah thei tura ruahman a ni.