Ram chhungah inthlahdul a ni Ramri khâr chhunzawm dawn

Mizoram sorkar chuan July 1-31 chhunga hman turin nimin khan inkhàrkhip leh inthlahdul chungchangah inkaihhruaina thar a tichhuak. State chhungah thui taka inkhàrkhip thlahdul a nih laiin, ramrite khâr chhunzawm a ni dawn. Zan dar 7:30 leh zing dar 4:30 inkarah tumah pawn chhuah phal a ni lo.

Inkaihhruaina thar ang chuan, sorkar, tlawmngai pawl, kohhran leh pisa dangte dan pangngaiin an kal thei tawh dawn a, dawrte pawh hawn theih vek a ni tawh. Damdawi zawrhna dawr tih loh chu tlai dar 6 hmain khâr vek tur a ni.

Zan dar 7:30 leh zing dar 4:30 inkar pawn chhuah khap tlat a ni.

Aizawl Municipal Corpo­ration (AMC) huam chhungah chuan mimal lirtheite chu odd-even (kawp kim leh kawp kim lo) angin intlân chhâwk chhunzawm tur a ni a, Pathianniah chuan phalna nei bâk tlan phal a ni lo. Intlân chhâwk hian zing dar 9 leh tlai dar 5 thleng a huam a; zirna-in leh training institute-te chu khâr chhunzawm a ni ang.

Sakhaw biakna hmunahte chuan mipui punkhawmna tur inkhawm pangngai neih phal a la ni lo a; biak-ina zing ṭawng­ṭai, inneih inkhawm leh lawmna (reception), mitthi vuina, lungphun, anniversary, politics leh pawl thila kal khawmte phal a ni a, mahse, mi 50 aia tam punkhawm phal a ni lo.

Games & sports practice, lehkhabu tlangzarh leh chutiang lam chi-ah chuan mi 25 aia tam punkhawm huaihawt khap a ni a; infiamna lamah inelna (tournament) leh mipui punkhawmna tur thil huaihawt phal a ni lo bawk.

Mizoram chhung khaw kar kawnga khualzin phur lirthei (commercial passenger vehicle) leh city bus, taxi, auto-rickshaw leh two wheeler taxi-te'n registration-a seating capacity tarlan aia tam phurh phal a ni lo a; lirthei khalhtute leh an phurhte'n hmai an tuam ngei tur a ni a, lirthei khalhtute'n passenger-te hman tur hand sanitiser an pai reng tur a ni.

Unlock 1.0 inkaihhruaina Ṭhenkhat

•    Office-te dan pangngaiin kal theih a ni tawh dawn

•    Minister interview khâr a la ni dawn

•    Infiamna (tournament ni lo) kalpui theih a ni a, lehkhabu tlangzarh phal a ni bawk a, mi 25 aia tam tel phal a ni lo thung

•    Zirna-in khâr chhunzawm tur a ni

•    AMC chhungah lirthei odd-even anga intlân chhâwk zel tur

•    Number kawp kimte Thawhṭanni, Nilaini leh Zirtawpni-ah an tlan thei

•    Number kawp kim lote Thawhlehni, Ningani leh Inrinni-ah an tlan thei.

•    Pathianniah phalna neite chauh tlan chhuah phal a ni

•    Phai aṭanga bungraw la lut turte'n mCOVID-I9 mobile application-a mPASS hmangin declaration an thehlut tur a ni.

•    Zing ṭawngṭai inkhawm, mitthi vuina, lungphun, politics thil, etc.-ah mi 50 aia tam punkhawm loh tur

Ramri chungchang

    International border leh inter-state border khâr chhunzawm a ni ang.

    Lengpui Airport hawn chhunzawm a ni ang a, thlawhna hmanga Mizoram lut tur reng rengin mCOVID-19 mobile application-a mPASS-FIight-ah an in register lâwk tur a ni.

    Bairabi, Vairengte leh Kanhmun kaltlang kawngpuite chu Mizorama hman tur bungraw phur lut leh Mizorama thar leh siam bungrua phur chhuak lirtheite tan hawn a ni ang.

     Mizorama lut tur zin veivahna lirthei chu Home department phalna nei chauh kal phal a ni dawn.

     Mizoram aṭanga chhuak tur zin veivahna lirthei erawh chu an awmna DC-te phalna lain an chhuak thei ang.

Screening & quarantine

    Mizoram páwn aṭanga lo lutte chu quarantine vek tur an ni. Quarantine dan tur fel taka ruahman a nih theih nan Mizoram sorkar phalna an la hmasa tur a ni.

    Phalna neia Mizorama lutte chu entry point-ah uluk taka enfiah (screen) zel a ni ang. Mizoram mi leh sa, lockdown vanga state páwna tangkhangte lo kîr leh dan tur ruahmanna chu May 15, 2020-a chhuah, Mizoram páwna tangkhangte Io luh dan tur kaihhruaina siam thar (Revised Standard Operating Procedure) angin kalpui a ni ang.

    Mizorama lutte khung hran dan tur chu Health department-in kaihhruaina a siam anga kalpui tur a ni. Driver leh handyman te, Mizoram páwn 

aṭanga bungrua laa zinte chu sorkar quarantine facility-ah an awm ang a, bungraw lak hna an thawh chhung zawng mi dang nen intlawhpawh loin quarantine aṭangin an thawk ang a, load an lâk hnuhnun ber aṭanga ni 14 hnuah an inah haw phalsak an ni ang.

    All Mizoram Petroleum Dealers Association leh Mizoram Tanker Drivers Association hnuaia driver leh handyman, Mizorama khawsa te, Mizoram páwn aṭanga oil phur lutte chu oil an unload hnuah Vairengtea an awmna turah an khawsa ang a, chuta aṭang chuan an chhungte nen intlawhpawh loin load an la ṭhin ang.

Sorkar, kohhran, etc. office

    Mizorama office zawng zawng dan pangngaia kal theih a ni a, office tinah SOP for Social Distancing khauh taka kalpui tur.

    Minister-te public interview khâr rih a ni.

Mipui vantlang inkhuahkhirhna

     Zan dar 7:30 aṭanga zing dar 4:30 inkarah páwna chhuah khap a ni. Hei hian Covid-19 kaihhnawiha duty te, phai aṭanga bungraw phur te, chhiat tawh thil leh medical emergency-a task force-te'n phalna an pekte a huam lo.

    Loh theih loh thil a nih loh chuan kum 65 chin chunglam te, hriselna lama harsatna nei sa te, nau paite leh naupang kum 10 hnuai lamte inah tawm tur.

    Páwna chhuak tur reng rengin hmai tuam tur a ni.

     Vantlang hmun leh dawra kalte chu metre hnih tala inhlata awm tur.

     Ram páwn aṭanga lo lut mikhualte tu mahin thlen (mikhual) phal a ni lo. Hei hian Home department/DC aṭanga phalna neite a huam lo.

Mipui punkhawmna hmun

    Zirna-in leh training institute-te khâr chhunzawm a ni ang.

    Sakhaw biakna hmunah mipui punkhawmna tur inkhawm pangngai phal a ni lo.

    Biak-ina zing ṭawngṭai, inneih inkhawm leh lawmna (reception), mitthi vuina, lungphun, champha lawm, politics leh pawl thila kal khawmte phal a ni a, mi 50 aia tam kalkhawm phal a ni lo thung.

     Inkhelh phal, lehkhabu tlangzarh leh chutiang lam chi reng reng tih phal a ni a, mi 25 aia tam tel phal a ni lo. Sport tournament leh mipui punkhawmna tur thil dang huaihawt phal a ni lo.

Dawr leh sumdawnna

    Dâwr, sumdawnna hmun leh eizawnna hmun dangte chu a pangngaia hawn theih a ni.

    Hawker stall-te chu DC kaihhruaina hnuaiah task force-te'n ruahmanna an siam anga kalpui theih.

    Beauty parlour, lumehna leh spa-te hawn phal a ni a, social distancing a awm theih nan appointment siam lâwk tur niin, mi panga aia tam awm phal a ni lo. Hmanruate uluk taka tihthianghlim zel tur a ni a, customer-te hming leh address ṭha taka chhinchhiah tur.

     Local task force-te'n chawhmeh zawrhna tur hmun an ruahman ang a, metre 2 aia inhnaih lo turin ṭhutna an ruahman ang. Inrinniah mipui an chhuah tam loh nan chawlhkar khatah ni thum tal thlai leh chawhmeh dang zawrh hun siam tur.

    Public park, picnic spot, movie theatre, gym leh intàwllènna hmunte khàr chhunzawm tur a ni.

    Dawr zawng zawng (damdawi dawr tiam lovin) chu tlai dar 6-ah khâr vek tur.

Aizawl bika inkhuahkhirhna

    Lirthei registration number odd-even anga intlân chhâwk zel tur. Pathianniah lirthei tlan chhuah phal a ni lo.

    Lirthei intlân chhâwkin a huam lohte: law & order duty lirthei, Covid-19 duty atana sorkar hnathawkte lirthei, ambulance, medical/veterinary emergency motor, bawlhhlawh paih, bawnghnute phurh/semna, P&E line duty, PHE tui sem, chanchinbu sem, LPG delivery, dâk semna atana hman motor te, print & electronic media mite lirthei, kohhran hminga motor register te, local task force duty-te lirthei (mahni veng chhungah), khaw kar bus, maxicab service.

    Intlân chhâwk hian zing dar 9 aṭanga tlai dar 5 thleng a huam.

    Chhiat tawh thilah, chhiat tâwk hming leh veng ziakin chhungkaw member-te tan leh medical emergency-ah chuan task force-te'n lirthei tlân phalna an pe thei. Ṭul bik dangah chuan Aizawl aṭanga chhuak tur leh khaw dang aṭanga lut turte tan Traffic SP-in phalna a pe thei. Phalna hi mCOVID-19 mobile application emaw, https://mcovidl9.mizoram.gov.in ah emaw a dil theih a ni.