Ka zin hlawhtling tak takin ka hria - Chief Minister ; Assam nen ramriah boruak ṭha siam a ni

New Delhi-a sorkar laipui dàwra zin chief minister Zoramthanga chu November 4, Inrinni khan a rawn haw a, Lengpui Airport-a amah hmuaktu hmaah thu sawiin, a zin hlawhtling tak taka a hriat thu a sawi a; Assam nena ramri buai awm pawh Assam Chief Minister nen boruak ṭha tak hnuaia an sawi dun thu a sawi.

CM Zoramthanga chuan, "Tun ṭum kan zin chu kan hlawhtling tak takin kan hria. Covid avanga hun rei tak kan boruak ṭang tawh takte chu pawh dul vek niin, a bik takin Assam nena kan ramri boruak chungchang pawh Assam Chief Minister leh Union Home Minister-te nen hahdamthlak taka lain boruak ṭha siam a ni," a ti.

Prime Minister, Home Minister, DoNER Minister leh minister dangte a dàwrnaah hlawhtling an intih thu sawiin Zoramthanga chuan, "A bik takin Prime Minister pawhin a hnena kan sawi, 'E! Hei chu kan ti dawn nia' a ti thei zel a, lawmawm ka ti," a ti a; Pathianin MNF tan, Mizoram tan, mipui tan kawng a hawng zela a hriat thu a sawi.

Chief Minister hian New Delhi-a sorkar laipui hotute a dàwr chungchangah vawiin hian Chief Minister's Office conference hall-ah thuthar thehdarhtute a kâwm dawn a ni.

Zoramthanga hian November 3 khan Delhi-ah Union Science & Technology minister Dr Jitendra Singh kawmin, Mizoramin All India Services cadre hrang a mamawhzia a sawipui.

November 3-ah vek Chief Minister hian Ambassador of Israel Naor Gilon sawmna angin Pragati Maidan-ah Watergen (Israel) Water from Air Technology-ah khualzahawm niin a hman pui.