Luia nungcha man phal lohna dan Bawhchhia hrem an la awm lo

Mizoram sorkarin October 10, 2021 aṭanga luia nungcha man phal loh hun 'Closed season' a puan chu mipuiin an zâwm ṭha a, dan bawhchhia hrem an la awm lo. Closed season hi December 18, 2021 thleng hman tur a ni.

Mizoram Fisheries Amendment Act, 2016 Section 5 (1) leh (2) behchhanin Mizoram sorkar chuan nghalim, nghadawl, chakai, chêngkawl leh kaikuangte inthlah pun hun October 10 aṭanga December 18, 2021 chhungin luia nungchate man phal loh hun (closed season)-ah a puang a; hemi chhungah hian luia nungcha man, nghafuan tur tihbuai leh nghafuan ruhte khap a ni.

Dan bawhchhiate chu The Mizoram Fisheries (Amendment) Act, 2016 Section 5 (1) leh (2) hmangin thla khat aia tlem lo lung-ina tàntir emaw, Rs 5,000 chawitir emaw, a pahnih emawa hrem theih a ni.

Fisheries department hotute chuan Vanglaini palai zawhna chhangin, closed season hman mek chu Mizoram luia nungchate inthlahpun zel theihna tur atana ruahman a nih thu an sawi a, "Mipuiin an zâwm ṭha viau niin kan hria. YMA-te nen kan thawkho a, branch hrang hrangin an khaw bul hnaia luite an humhalh. Department staff-te pawhin a remchan danin YMA duty-te an tlawh kual a, kan phûr tlang khawpin kan hria," an ti a; dan bawhchhia man leh hrem ngai an la awm loh thu an sawi.

Fisheries department hian YMA branch hrang hrang zinga lui humhalh ṭha hnenah lawmman a hlan dawn a, Central YMA-in lawmman dawng turte an thlang dawn a ni.