KHAWTHLIR

Hnathawh enfiah
Khawzawl Tuisen phai leh Champhai police checkgate, Khankawn inkara NH-6 zauh leh siam hna thawh mek chu tun hnai khan Champhai District NGO Coordination Committee-in an enfiah. Kawng siamtu Shri Balaji Construction chuan, zangnadawmnaa lungawi lo leh zangnadawmna la thei lote avangin hmun ṭhenkhatah hna an thawh theih loh thu Champhai NGO an lo hrilh. Kawng siam tur hi km. 26.78-a thui a ni a, cheng vbc. 370 ruahman a ni.

BJP-in ngen
BJP, Mizoram Pradesh hruaitute chuan an president Vanlalhmuaka hoin November 3, Inrinni khan Delhi-ah minister of state for Social Justice and Empowerment Ramdas Athawale an kâwm a, Mizoram mamawh hrang hrang an thlen. BJP hruaitute chuan, Myanmar ram buai avanga Zo hnahthlak Mizorama ráltlânte'n buaina an tawh lohna atana hmalakpui a, a chanpual ministry aṭanga ṭanpuina awm thei hmanga ṭanpui turin an ngen a ni.

Parliament PAC Lawmnaah tel
Parliament-a Public Accounts Committee (PAC) chuan December 4-5 chhung khan Central Parliament Hall, New Delhi-ah kum 100 tlin an lawm a, Mizoram aṭangin Assembly speaker Lalrinliana Sailo, PAC chairman Vanlalhlana, MLA Dr Vanlalthlana, Assembly secretary H Lalrinawma leh committee officer Vanlalfamkima Sailo-te an tel. Inkhawmah hian Mizoram Assembly PAC chairman Vanlalhlana'n Mizoram PAC hnathawh dan a sawi a ni.

Lei dawh tlawh
Minister of state Robert Romawi Royte chuan December 4, Inrinni zing khan a bial, Aizawl East-II chhunga Tuithiang Veng, Saron Veng leh Chhinga Veng inkalpawhna tur lei dawh mek a tlawh a; Covid-19 vangin harsatna awm mah se, hna chak taka PWD leh contractor-te'n an thawh avangin a lawm thu sawiin, uluk leh ṭha taka thawk turin PWD engineer-te leh contractor-te a chah. Lei dawh mek hi metre 74.5-a sei leh metre 5-a zau a ni a, cheng nuai 200 senga dawh a ni.