Remna Ni-ah MNYF-in thisen an pe

Mizo National Youth Front (MNYF) chuan Remna Ni pualin nimin khan Aizawl leh district khawpui hrang hrangah thisen pek rûnpui an huaihawt a, thisen unit 264 an pe. Aizawla thisen pek rûnpui chu Health minister Dr R Lalthangliana, Assembly deputy speaker leh MNYF president Lalrinawma leh minister of state TJ Lalnuntluanga ten an hmanpui. 

Aizawla Mizo Hnam Rúna thisen pek rûnpui huaihawtah Health Minister chuan, thisen pek chu a namailo a, a hluin a ropui hle tih sawiin, "Pathian duh zawng tak a ni. Mi dangte hmangaiha kan hnathawh hi Health department aiawh leh Mizoram sorkar aiawhin lawmthu ka sawi a ni," a ti a; ṭanpuina pawisa a hlân a ni.

MNYF president Lalrinawma chuan, thisen pe zawng zawng chungah lawmthu sawiin, "Mihring dam laite'n mi dangte tana kan tih theih hlu ber chu thisen kan pek hi a ni a, damlo mangangte'n an lo hman atana thisen pe heti zat mai kan awm hi a lawmawm a, thisen petu zawng zawng chungah lawmthu ka sawi a ni," a ti. MNF ṭhalai thisen pek rûnpuiah hian thisen unit 264 pek a ni a, a petute mipa 234 leh hmeichhia 30 an ni.

MNYF thisen pek dan

District    Pek zat

Aizawl    166 (M-146; H-20)

Lunglei    20 (M-14; H-6)

Siaha    10 (Mipa vek)

Champhai    14 (Mipa vek)

Serchhip    28 (M-27; H-1)

Lawngtlai    26 (M-23; H-3)

TOTAL    264 (M-234; H-30)