Ni hnih chhungin hripui vei Mi 597 hmuh chhuah a ni

Mizoramah Covid-19 vei December 3, Zirtawpni khan mi 315 leh December 4, Inrinni khan mi 282 hmuh chhuah a ni a, ni hnih chhungin mi 597 hmuh a ni. Inrinni leh nimin khan hripui vei dam tawh mi 890 an chhuak a, Covid-19 vangin mi pathum an thi.

Covid-19 vei December 3-a hmuh chhuahte chu mipa 130 leh hmeichhia 185 an ni a, ZMC laboratory-a hmuh 24, TrueNAT hmanga hmuh 12, RAT hmanga hmuh 276 leh FIA hmanga hmuh pathum an ni. Inrinnia hmuh belhte chu ZMC-a hmuh 49, TrueNAT hmanga hmuh 25, RAT hmanga hmuh 205 leh FIA hmanga hmuh pathum an ni a, mipa 137 leh hmeichhia 145 an ni.

IDSP record angin, Mizoramah Covid-19 vei 1,36,362 hmuh chhuah a ni tawh a, mipa 65,838 leh hmeichhia 70,524 an ni a, mipa aiin hmeichhia 4,686-in an tam zawk. Nimin tlai dar 5 thleng khan mi 1,32,846 (97.42%) chhuahtir an ni tawh a, mi 507 (0.37%) thi tawhin, enkawl mek mi 3,009 (2.21%) an awm.

December 3, Zirtawpnia Covid-19 vei hmuh thar mi 315 zingah symptom nei mi 218 an awm a, mi 97 erawh chuan symptom an nei lo. Zirtawpnia swab sample endikah positivity rate 10% chung lam district pathum chiah a awm a, positivity rate sànna ber Serchhip district-ah 22.63% a tling. Positivity rate 10% chung lam dangte chu - Champhai 21.34% leh Aizawl 18.05% a ni.

December 4, Inrinnia Covid-19 vei hmuh thar mi 282 zingah symptom nei mi 128 an awm a, mi 154 erawh chuan symptom an nei lo. Inrinnia sample endikah positivity rate 10% chung lam district panga a awm a, positivity rate sànna ber Serchhip district-ah 60.71% a tling. Positivity rate 10% chung lam dangte chu - Hnahthial 37.21%, Champhai 26%, Khawzawl 17.34% leh Lunglei 11.29% a ni.

December 3-4 chhungin Serchhip district-a Léng khuaah hripui vei mi 27 hmuh chhuah a ni a, December 3-ah mi 11 leh December 4-ah mi 16 hmuh a ni. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 4, 2021 thlenga swab sample endik tawh 14,45,048 aṭanga RT-PCR hmanga endik zat percentage chu 22.55 a ni a, RAT hmanga endik zat chu 71.54% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,36,362 chu mi 1,000 zelah hripui vei mi 124 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.