Court thu angin CSS Hindi teacher-te'n anmahni la leh vek turin sorkar an ngen

Mizoram CSS Hindi Teachers' Association (MCHTA) chuan, Gauhati High Court thutlukna angin CSS hnuaia Hindi zirtirtu bàn tawhte chu lak leh vek an nih theih nan ruahmanna siam turin Mizoram sorkar an ngen.

December 4, Inrinni khan MCHTA hruaitute chuan Aizawl Press Club-ah thuthar thehdarhtute an kâwm a; an president Lalchhuanliana Parte chuan, CSS hnuaia Hindi zirtirtute chu trained lote pawh Mizoram sorkarin a lak leh vek ang nge tih sawiin, "CSS Hindi teacher-te hmakhua ngai em em ṭhintu Mizoram sorkar chuan kan ngenna ang hian hma min laksak ngei kan ring," a ti.

MCHTA President sawi danin, CSS Hindi teacher mi 1,305 chu February 18, 2011-ah appointment pek an ni a, Departmental Promotion Committee (DPC) kaltlanga lak an ni. Guideline-ah chuan, central sorkarin a sponsor a tawp hunah an hna leh hlawh chungchanga mawhphurhna chu state sorkar kutah a awm tur thu chiang taka ziah a ni a, guideline chu sorkar laipuiin sanction order apiangah a tarlang tel ṭhin.

School Education Director pawhin October 6, 2013 khan CSS Hindi teacher 1,305-te chu a tahtawla sorkara dah nghet (absorb) vek turin School Education changtu Under Secretary hnenah a thlen a; mahse, dah nghet loin, kum 2017 khan an vaiin bàn an ni.

CSS Hindi teacher-te chu kum 2018 khan High Court-ah an zualko a, Court chuan October 21, 2021 khan order tichhuakin, Mizorama CSS Hindi teacher bàn takte chu la (re-engage) leh vek turin Mizoram sorkar a hriattir a ni.

Court order-ah chuan, sorkar ukil Linda L Fambawlin sorkar aṭanga thu a hmuh angin CSS Hindi teacher-te daih tâwk post a awm thu leh qualification an neih ang ang nen Samagra Shiksha hnuaiah re-engage an nih tur thu Court a hrilh tih a lang.

High Court order chhuah hnu, kumin November thla tìr khan School Education minister Lalchhandama Ralte-in MCHTA hruaitute chu a kâwm a, sawi tura an tih loh ang deuhin High Court-ah sorkar ukil Linda L Fambawl-in a sawi nia sawiin, court-a sorkar ukil thusawi chu siamṭha (re-correction) turin high court an ngen dawn thu a lo hrilh.

Lalchhuanliana chuan, Supreme Court order angin India rama zirtirtute chu trained vek an ni tur a ni, tih a nih laiin CSS Hindi teacher zinga tam tak chu trained an ni lo tih sawiin, CSS Hindi teacher-te chu kum 2011-17 chhungin train phalsak an ni ve lo tih a sawi a, “High court order-in re-engage leh vek tur a tih laia untrained kan nih avanga sorkarin Court oder tihdanglam a tum hi mihring dikna chanvo palzûtna lian takah kan ngai,” a ti.

Zawhna chhangin Lalchhuanliana chuan, Congress sorkar laia lungawi lohna an lantirnaah MNF hruaitu, tuna minister ni tate’n an ṭawng thlamuan ṭhin thu leh tuna Chief Minister pawhin lengah a sàwm thu a sawi a, “Congress an tlak theih nan theihtawp chhuah turin kan member-te kan inchah a, MNF pawh kan side nasa,” a ti a; MNF sorkarah beiseina an neih san thu a sawi.

MCHTA hruaitute sawi danin, MNF sorkar hnua Hindi teacher 665 lak turah trained-in an daih loh avangin mi 541 lak an ni a, chu’ng zingah chuan CSS Hindi teacher ṭhin mi 238 an tel. Sorkarin Hindi teacher 314 lak leh a tum a, calling letter hmu zingah CSS hnuaia thawk ṭhin mi 100 vel an tel a ni.