Cheng nuai 100 senga km. 11 a thui Cherhlun-Ṭiau kawng sial thar hawng

Minister Dr R Lalthangliana chuan December 4, Inrinni khan Cherhlun khua leh Ṭiau lui inkar kawng laih thar a hawng. Kawng hi Border Area Development Programme (BADP) sum nuai 100 hmanga laih a ni a, km. 11-a thui a ni.

Dr R Lalthangliana chuan, Cherhlun-Ṭiau kawng chu MNF sorkar hmasak laia Rural Development minister a nih laia Rs. 3,00,000 senga laih ṭan a nih thu a sawi a, “Economic road, potential area connectivity tih hial tura kawng pawimawh a ni a, balu ringawt lâkna tur kawng a ni lo a, nùl-an chi tinreng leh mau thlenga kan châwk luhna tur kawng pawimawh a ni,” a ti.

Myanmar politics buai avanga Mizo eng emaw zat Mizorama rawn tlanchhiate chu an bialah eng emaw zat an awm tih sawiin R Lalthangliana chuan, “Mimal leh pawl angte’n theihtawp chhuaha in lo buaipui hi lawmawm ka ti a, an chungah ṭhat lo chhuah zel ang che u, chu chu Pathian thu a ni,” a ti. Kum tharah chuan SEDP hmangin chhungkaw eng emaw zat an tuamhlâwm thei tawh a beisei thu a sawi bawk.