Covid-19 vangin mi 507 thi tawh

Nimin khan tlai dar 5 thlengin Mizoramah Covid-19 vangin mi pahnih an thi a, December 4, Inrinni khan mi pakhat a thi bawk. Mitthi pathumte hi natna dang nei tel vek an ni. IDSP tarlan danin, nimin tlai dar 5 thlengin Mizoramah Covid-19 vangin mi 507 an thi tawh.

December 4, Inrinni zan dar 8:05 khan Sangthankima (56), Zawlnuam Bawrai Veng chu Covid-19 vangin Zawlnuam damdawi-in (PHC)-ah a thi a; Covid-19 positive a ni tih November 30, 2021 khan hriat chhuah a ni a, mahni in lama inenkawl a ni.

Nimin zing dar 7:50 khan Ngurliana Sailo (70), Reiek chu hripui vangin State Referral Hospital-ah a thi a; Covid-19 vei a ni tih November 21, 2021 khan hmuh chhuan niin, November 27 aṭangin SRH-ah enkawl a ni. Huapliani (84), Sairang Dawrveng pawh nimin chawhnu dar 1:55 khan hripui vangin Sairang DCHC-ah a thi a, Covid-19 positive a ni tih November 26, 2021 khan hmuh chhuah a ni tih sorkar thuchhuakin a tarlang.