Sorkar insawifiahna pawm zel vangin RT-PCR for Chhimbial an inhnûkdâwk

RT-PCR Lab for Chhimbial chuan, Lungleia RT-PCR laboratory din chungchangah sorkar insawifiahna leh chhuanlamte YMA Sub Headquarters, Lunglei kaihhruai NGO Coordination Committee-in a pawmsak zel nia ngaiin, NGO Coordination Committee aṭanga an inhnuhdawh thu an puang.

RT-PCR for Chhimbial chuan thuchhuah siamin, Gauhati High Court, Aizawl Bench-ah Lungleia RT-PCR bun a nih theihna atan PIL an thehluh thu an tarlang a, "Chumi thu kal zelah chuan High Court pawhin Mizoram sorkar chu Lungleia RTPCR khawl bun turin thu a pe a ni. Thupek bawhzuiin sorkarin committee dinin member-ah Lunglei Ṭhalai Pawl Chief Organiser leh YMA Sub-Hqrs Lunglei President a telh a, kan lawm hle," an ti.

Sorkar hmalakna kal zelah duhkhawp lohna leh muang leh vuaicha tihna tam tak a awm a, a huhoa NGO Coordination hminga RT-PCR bun thuai a nih theih nan hmalakna kalpui ṭhaa an hriat thu tarlangin RT-PCR for Chhimbial chuan, "Lungleia NGO-te phungbawma sáwmin hma kan la ho chho a ni," a ti a; pawl hrang hrang duh dan angin Joint NGO anga hmalak a nih tak thu an tarlang.

RT-PCR for Chhimbial chuan, resolution vawi hnih siam a nih tawh hnu leh press meet neih a nih tawh hnuah pawh chhimbial tana RT-PCR hman theih a la awm loh thu tarlangin, "Sorkar insawifiahna ngaithla a, pawmsak zel a, ngaichâng zel ringawt tura NGO Coordination anga hmalakna hi awmzia a awm dawn chuangin kan hre ta lo a ni," an ti.

RT-PCR for Chhimbial chuan, contempt of court case an file pawh High Court-in a ngaihtuah mek tih tarlangin, "RT-PCR Lab. kan neih thuai theih nan kan thiam dan danin hma kan la zel dawn a ni," an ti a; anmahni finchhuah a, thawhpui turin chhim bial mipui an ngen a ni.

" Sorkar insawifiahna ngaithla a, pawmsak zel a, ngaichâng zel ringawt tura NGO Coordination anga hmalakna hi awmzia a awm dawn chuangin kan hre ta lo a ni,"