Sorkar hnathawk hlawh pûk ṭan
Finance department chuan June 2020 atana sorkar hnathawk hlawh an pe chhuak tawh a, Council of Ministers thutlukna angin, June thla hlawh aṭangin Mizoram sorkar chuan a hnathawkte hlawh a pûk ṭan.
Vanglaini palai zawhna chhangin Finance department hotute chuan, hlawh pûk ṭan a nih thu an sawi a, "Hlawh pûk aṭang hian cheng vbc. 30 vel kan hmuh theih kan inbeisei. Report a la lut kim lo a, a zat chiah kan la hre thei lo," an ti. Tarlan tawh angin, Covid-19 hripui leng leh inkharkhip vangin Mizoram sorkar sum leh pai dinhmun a ṭha tâwk lo a, chuvang chuan Mizoram sorkar chuan a hnathawkte chu June, July leh August hlawh a pûksak dawn a ni.
Sorkar hnathawk hlawh hi a pumpui (gross salary) aṭanga pûk tur a ni a, group A employee-te aṭangin 15%, group B leh C aṭangin 10% leh group D staff-te aṭangin 5% pûk a ni. Thla khata Rs. 40,000 aia tlem hlawhte bakah, Health department leh Police department-a thawkte erawh pûksak a ni lo. Hlawh pûksak turte hian Rs. 40,000 aia tlem lo hlawh an lâk theih nan ruahmanna siam a ni a; hlawh pûk chu sorkar sum dinhmun a ziaawm deuh hunah a pung awm loin instalment-a rulh tura tih a ni.