Lottery-ah naia-sen pawh ka ei lo - CM Lal Thanhawla

Chief minister leh Congress party president Lal Thanhawla chuan, Mizoram State Lottery-ah amah leh Finance minister Lalsawta ten naia-sen khat pawh an ei lo niin a sawi.

Nimina Congress Bhavan-a inkhawmah Lal Thanhawla chuan, "MNF-te hian an sorkar lai khan state lottery-ah an pute'n ei an nei ṭhin tih an hria a, khatiang khan kan ei turah ngaiin an tuipui a, mahse, chutiang ang in kan ti ve lo. Kan Finance Minister leh Lal Thanhawla te hian state lottery-ah hian naia-sen khat pawh kan ei lo," a ti.

MPCC President chuan, tunlaiin MNF-te'n lottery an tuipui hle tih sawiin, "An sorkar lai khan state lottery hi ṭenghneng takin an lo kalpui ṭhin," a ti a; MNF-te chuan sorkarna an chelh lai aṭangin state lottery kal dan chu lo tuipui tawh se thil ṭha tak a nih tur thu a sawi.

Lal Thanhawla chuan, MNF-te'n May 17, 2017-ah lottery chungchangah CBI ko lut turin a hnenah thu an thlen tih sawiin, chumi tûkah chuan Chief Secretary hnenah hma la turin ka hriattir nghal niin a sawi a, "Ka intiam tawhna angin lottery leh Mizo Carbo chhui turin ka ti a ni. Mizo Carbon-ah chuan CBI chuan, 'Chhui ṭul kan ti lo e' tiin Imphal leh Delhi aṭangin min rawn chháng a, lottery-ah chhanna kan la hmu lo. Hemi chungchangah hian eng pawh kan ngam a ni," a ti.

Bru lak let tur chuangchangah Chief Minister chuan, "Sorkar hotute leh Central hotute vawi tam tak an inbiak hnuin hmanni lawkah Union Home minister Rajnath Singh hoin September 30 hmaa lo kir turin remna an siam ta a. Hemi chungchangah Mizorama tlawmngai pawl hrang hrang inzawmkhawm (Joint NGO)-te'n Tuikuk hruai lêt tura ruahmannate ṭha an ti hi lawmawm hle a ni," a ti a; tlawmngai pawlte leh sorkar chu Bru chungchangah an inráwn a, an thawkho ṭha hle tih a sawi.

Lal Thanhawla chuan, Bru lak let chungchanga Union Home Minister hoa inremna ziah a nih hmain, Bru zinga thu awiha Mizorama kîr hmasa ṭanpuina pe fumfê loa an awm lai a, thu awih lo zawkte chhawmdawlna pek chu ṭha an ti loh thu Union Home Minister a hrilh tih a sawi a, "Pu Rajnath Singh pawhin Home Secretary-te a koh nawn phah hial a, chuti chungin hetianga kalpui tura an lo inrem tawh si avangin tun ang hian kalpui phawt a ni ang a, Mizorama let hmasate chungchang chu ngaihtuah zui zel turin kan ti ta a ni," a ti.