Saitualah 'Lungawi lohna Ni' an hmang

Saitual district headquar­ters atana puan tawh tihpuitlin an duhzia lantir nan Saitual District Implementing De­mand Committee (SDIDC) leh Saituala tlawmngai pawl leh political party hrang hrangte huaihawtin nimin khan an khuaah ‘Lungawi lohna Ni’ an hmang a, Saitual town area-a pisa leh zirna-in zawng zawng khâr a ni.

'Lungawi lohna Ni’ an hmanah hian Saitual town area-a sorkar pisa leh zirna-in zawng zawng khâr a nih bakah, hmun hrang hrangah lungawi lohna thuziak (banner & poster) an tár a, lirthei zawng zawngah flag dum an tár a ni.

Chawhma dar 11-ah Saitual SDO (SDO) Complex péngṭhuamah mipui an pung khawm a, SDIDC vice presi­dent Ramchhuanmawia kaih­hruaiin inkhawm tawi neih a ni. SDIDC president Ro­hmingliana bakah, Saitual Town Joint V/C, Saitual Group YMA, Block MHIP, MUP Saitual & Keifang area, MZP aiawhte'n thu an sawi a; resolution an pass bawk.

Resolution Point Palite
1) Congress sorkarin kum 10 chhunga min lo tiam tawh, tun thlenga min la tihpuitlinsak thei lo hi kan lungawi lo tak zet a. Minister zawng zawngte'n àwm min tihpui vek a, ti tura min tih ang apiang kan tihhlawhtlin zel lai leh Aizawl district ṭhen a tulzia min sawi khum chàmchi chunga district tipuitling tur zawnga hmalakna a awm miah lo hi Congress sorkar chungah kan lungawi lo tak zet a, kan hrethiam thei lo a ni. Ram an thlir a, àwm min tihpui a, party an thlir a, hma kan sâwn thei si lo hi ram hmangaih politician-ah kan ngai thei lo.
2) Anmahni thutiam ngei pawh tun thlenga min la tihpuitlinsak theih loh avangin kum 2018 MLA Election lo awm turah hian DC tel lo chuan Ṭawi constituency-ah hian Congress party chu candidate rawn siam lo turin kan hriattir a, an rawn siam lui a nih chuan a ṭul angin hma kan la ve ang. District hi min tihpuitlinsak erawh chuan kan tih tur kan hai bik lo ang. Politician-te'n mahni tih theih loh pui intiam an chíng ṭhin hi mipui bumna a ni a, tun hnuah thleng tawh lo se kan ti.
3) Kan Bialtu Minister hian theihtawp a chhuah chunga a intiam ang min tihhlawhtlinpui theih tak loh avang hian, a bialte thlavâng hauh nan leh bial a hmangaihna lantir nan Minister a nihna aṭang hian lo châwl ve tawh rawh se.
4) Kum 44 lai district kan lo nawr tawh hi a hlawhtlinna hmel kan hmuh hma loh chuan kan bei zel dawn a ni.