Zodin Multi Level Car parking sak tur Lungphùm Zodintluanga'n a phúm

Zodin Cinema Hall ṭhin hmuna Zodin Multi Level Car parking cum Utility Centre sak tur lungphùm chu nimin khan UDPA minister Zodintluanga'n a phúm. Building hi New Eco­nomic Development Policy (NEDP) sum cheng nuai 2,500 hmanga sak tur a ni a, car 98 dah theihna tur a ni.

Minister Zodintluanga chuan, Zodin Multi Level Car Parking chu Mizorama khawl hmanga car park-na (robotic car parking) hmasa ber tur a ni tih sawiin, sak ṭan a ni dawn ta chu lawmawm a tih thu a sawi a, "Aizawl khawpui tâwt vanga harsatna sutkianna tur kawng hrang hranga dapin UDPA chuan kawng péngṭhuam hmun eng emaw zatah a zauh tawh a, Zodin Multi Level Car Parking changkang tak, mihringin a buaipui ngai loa khawlin car a park-na tur sak a ni leh dawn ta hi Mizoram tana méllung pawimawh tak a ni," a ti.

Zodintluanga chuan, Zodin Multi Level Car Parking cum Utility Centre sakna tur hian open tender-in architech-te inelna siam a nih thu leh, a satu tur contractor thlanna turin open tender chhuah a nih thu a sawi a; NEDP hnuaiah vêk Transport office thlanga Chaltlang Lily Veng YMA ramah maxicab dahna tur car parking siam tum a nih thu leh, chuta tan chuan Lily Veng YMA-te nen hma lakho mek a nih thu a sawi bawk.

UDPA department chu khawpui tihhmasawn hna thawk tur a nih bakah, retheihna umbo (poverty alleviation) tura ding a nih thu sawiin Zodintluanga chuan, "Poverty alleviation hi kan ngai pawimawh hle. Khawpuia miretheite'n eizawnna an neih theih nan self help group-te dinsak an ni a, kawng hrang hrangah training pek an ni a, mi tam takin eizawnna an neih phah a ni," a ti.

Zodin Multi Level Car Parking cum Utility Centre sak dan tur siamtu (architech) chu JMT Architect niin, anni hi Precision Automation & Robotic India an thawhpui a; chhawng kuaa sang tur niin, chhawng paruk chu car dahna tur a ni. Car-te chu a khalhtuin a dah (park) buai a ngai dawn lo a, khawl hmangin chhâwng hrang hranga dahna tur hmun âwlah dah a ni ang. Food court, exhibition hmun, mi 200 ṭhut theihna multipurpose hall leh khaw thlirna hmunte a awm bawk ang.

Lungphùm inkhawm hi UDPA secretary Dr C Vanlalramsanga’n a kaihruai a; MLA pahnih - T Sangkunga leh Chal­rosanga Ralte-te pawh an tel a ni.