SHC member turte lak luh an ni

Sinlung Hills Council (SHC) sorkar lailawka member turte chu nimin khan Aizawl DC Dr A Muthamma-i'n a pisaah rinawmna thu tiamtirin a la lut. SHC member atan hian sorkarin a ruat mi 12 leh nominated member mi pahnih, an vaiin mi 14 lak luh an ni.

Mizoram sorkar leh HPC(D)-te an inbiak laia HPC(D) aiawhte thupuangtu, Lalṭhalien chu chief executive member (CEM) atan lak luh a ni a, HPC(D) working chairman Lalthanglien (LT Hmar) chu chairman atan lak luh a ni. Inremna a awm hmaa HPC(D) deputy army chief ṭhin Lalbieknung chu deputy chairman atan lak luh a ni thung.

Inrem hmaa HPC(D) general secretary Darliensun Ralsun, HPC(D) cadre JC Zairemkunga, Melo­dy Lalchhuangzeli d/o H Zo­sangbera (HPC-D Chairman) leh Lalthlamuana Hmar te chu execu­tive member (EM) tan lak luh an ni.

Mi dang pasarih - Rohringa Hmar, Lalrinsanga Ralte, Benjamin, B Lalṭhachhunga, Lalremruata Varte leh nominated Malsawma Dar­ngawn leh Lalrammuanpuia te chu member atan lak luh an ni bawk.

SHC CEM thar Lalṭhalien chuan, SHC chu Hmar mipuite bakah, a huam chhunga mipui zawng zawngte tan a nih thu sawiin, "Inunauna, impumkhatna, insuikhawmna ṭha zawk leh inremna tluantling awm theihna atana Mizoram sorkar hmalakna hi a lawmawm hle. SHC hian impumkhatna, inunauna leh moral change SHC area mipuiah thlen ngei se kan duh a ni," a ti.

SHC session hmasa ber chu nimin khan SHDC pisa ṭhin, Khatlaah chairman LT Hmar kaih­hruaiina hnuaiah an ṭhukhawm nghal a ni.