KHAWTHLIR

Thisen pe
Hnahthial Peniel Branch YMA chuan an din champha pualin nimin khan an YMA Hall-ah blood donation camp an huaihawt a, Lunglei Civil Hospital tan thisen unit 41 an pe a, a petute mipa 35 leh hmeichhia paruk an ni. 3rd. Battalion MAP Kohhran ṭhalai pawl pawhin an din champha pualin nimin khan Aizawl Civil Hospital tan thisen unit 20 an pe a, a petute mipa 19 leh hmeichhia pakhat an ni.

Tanpuina pe
Mary Mount School chuan nimin khan Mary Mount Day leh School Foundation Day an hmang a, an sikula lut tawh, Class of 1993-te khuallian an ni. 1993 batch-te hian nimin khan Aizawl Civil Hospital Poor Fund-ah Rs. 10,000 an pe.

Designation Meaning
K Zothanmawia lehkhabu ziah, 'Designation Meaning' (Nihna awmzia) tih chu nimin khan MJA president Zonunsanga Khiangte-in Aizawl Press Club-ah a tlangzarh.

Tihniam turin hrilh
MSU-in cement rate tihsan chungchanga FIR an thehluh bawhzuiin Aizawl SP C Lalzahngoa chuan nimin khan cement company pathum - Star, Topcem leh Dalmia dealer-te leh an aiawhte a pisaah a ko a, cement man an tihsan tawh chu tihniam leh tura hma la turin a hrilh.

Zaithanchhungi thi
Ram fan bu eng emaw zat ziak tawh Zaithanchhungi (79) w/o LN TLuanga (Ex-MLA), Electric Veng, Aizawl chu nimin tlai dar 4:20 khan cancer natna vangin a thi a, vawiin chhun dar 12-ah vui a ni ang.

Compartmental Exam result
Mizoram Board of School Education chuan nimin khan HSLC leh HSSLC Compartmental Exam result a tichhuak. HSLC-ah exam hmachhawntu mi 304 zinga 257 an pass a; HSSLC-ah chuan Arts-ah mi 112 zinga 82, Science-ah mi 39 zinga 38, Commerce-ah mi panga zinga pali leh Vocational-ah mi 18 zinga pasarih an pass a ni.