Remna leh muanna tichhe zawnga chête Sorkarin a dim dawn lo - R Lalzirliana

Home minister R Lalzirliana chuan, remna leh muanna tichhe zawnga chête sorkarin a dim dawn loh thu a sawi. He thu hi BADP sum hmanga sak Ngur Community Hall nimina a hawnnaah a sawi a ni.

R Lalzirliana chuan, Zo fate chu hnam tlemtê an la nih avangin inlungrualna ṭha an neih a ṭul thu leh lungrualna chu ram leh hnam dinchhuahna atana pawimawh a nih thu a sawi a, "Remna leh muanna awm theihna turin sorkarin nasa takin ṭan a la a, tun hnaiah HPC(D)-te nen inbiakna kaltlangin remna duhawm tak siam a ni," a ti.

Mipuite chu remna leh muanna siam kawngah sorkar thawhpui tura chahin R Lal­zirliana chuan, "Remna leh muanna tichhe zawnga chete chu sorkarin a dîm dawn lo a ni,” a ti a; remna leh muanna hnuaiah hmasawnna a chak theih avangin sorkarin a ngai pawimawh a, vawn nun zel a tum thu a sawi.

R Lalzirliana chuan, hruaitu ṭha ni tura ṭan lakna tur hrang hrang sawiin, "Hruaitu ṭha ni tur chuan khawtlang leh kohhranah mite kai­hruaitu, zirtirtu leh entawntlak nih a ngai," a ti.

Ngur Community Hall hi BADP sum nuai 25 hmangin kum 2008-ah sak ṭan a ni a, a dung ft. 72 leh a vâng ft. 40 a ni.