Doctor transfer order Lungleiah an hâl
MZP headquarters, Lunglei chuan Lunglei Civil Hospital (LCH)-a thawk doctor hmun danga sawn chhuah hnua tun thlenga anmahni thlaktu tur sorkarin a la dah loh vanga lungawi lohna lantir nan nimin khan LCH Medical Superintendant pisa kawtah transfer order copy an hâl.
Lunglei MZP president Lalrammuanawma chuan, LCH aṭanga doctor transfer-te aiawh dah turin Mizoram sorkar an ngen tawh a, Health minister Lal Thanzara pawh an hmu tawh nia sawiin, "Tun thlenga hlawhtlinnna hmuh a la nih loh laia June 18, 2018-a doctor pakhat sawn chhuah a ni leh hi MZP leh Lunglei mipui zah lohnaah kan ngai," a ti a; LCH chu chhim lam mipui pan khawm ber a nih avangin district hospital dang nen tehkhin chi a ni lo niin a sawi.
LCH chu State Referral Hospital leh Aizawl Civil Hospital-te nen dinhmun inang an nia sawiin Lunglei MZP President chuan, "LCH hi department tam tak leh khum 150 awmna a ni a, department ṭhenkhatah doctor pakhat chauh kan nei reng hi a lungawithlak loh. Transfer a awm apianga Aizawl doctor che loa district dang doctor sawn chhuah a ni bik zel hi sorkar hian zuam zawng leh duhsak zawng a nei tih a lang chiang a ni," a ti.
Lunglei MZP President chuan, nimina lungawi lohna an lantir chu a bul ṭanna chauh a nih thu sawiin, July 16, Thawhṭanni aṭangin picketting kan ṭan dawn a, chumi hnua chanchin lawmawm kan hre lo a nih chuan a tawp thlengin a bei dawn a ni," a ti a; an hmalakna thláwp turin Lunglei mipui a sáwm a ni.