Naupang 3 thihna inthlahdah vangah ngai lo

Lunglei police chuan June 25, 2018-a Haulawng dáia Horticulture-in a siam Centre of Excellence tuikhuaha naupang pathum an tlak hlum dan chu tute emaw fimkhur loh vang emaw, inthlahdah vang emaw ni loin, vanduai vang liau liau niin an tarlang.

Centre of Excellence tuikhuaha naupang pathum tlak hlum chungchangah hian Mizoram State Commission for Protection of Child Rights (MSCPCR) chuan chhui chiang turin June 29, 2018-ah police a hriat­tir a, Lunglei police-te'n an chhui hnuah, tun hnai khan MSCPCR-ah report a thehlut a ni.

Police-in MSCPCR-a report an thehluhah hian Lunglei Police Station officer-in-charge HS Lalmuanpuia chuan, naupang pathumte vanduaina tawh dan an chhui dan leh thil thlen dan kimchang a tarlang a; naupang pathum thihna kaihhnawihah mi tute emaw fimkhur loh leh inthlahdah vanga thil thleng hmuh a ni lo tih a tarlang a ni.

MSCPCR chairperson Sangzuali Vanchhawng chuan, police hmalak dan chu lungawithlak a tih thu leh lawmawm a tih thu a sawi.