Tlabung lamah kawng siam a chhe hma - Tlabung MZP

Mizo Zirlai Pawl (MZP) sub-headquarters, Tlabung chuan thuchhuah siamin, Tlabung leh Khawthlangtuipui hnár lama khaw hrang hrangte kalpawhna kawng, tun hnaia siam chuan thla li pawh a daih lo niin an tarlang.

Tlabung MZP hruai­tute chuan, National Rural Roads Development Agency (NRRDA) hnuaia duan PMGSY sum hmang­a Tlabung leh Kawizau inkalpawhna kawng siam zawh tawh chu nimin khan an tlawh a; kawng chu March 2018-ah siam zawh ni mah se, lirthei tan zawh harsa khawpin a chhe leh hman tawh tih sawiin, "Kawng chhuat atana cement chhûn pawh a khawk leh deuh vek tawh a, culvert ṭhenkhat pawh lirthei tan zawh a hlauhawm hle a ni," an ti.

Tlabung MZP chuan, kawng chu Tlabung leh Khawthlangtuipui hnâr lam khaw hrang hrangte inkalpawhna kawng pawi­mawh a nih thu sawi­in, sum tam tak sênga thawm ṭhat a nih aṭanga thla tam a ral hmaa a chhe leh nghal chu kawng hmangtu mipui hmuhsitnaa an ngaih thu an tarlang a, a ṭul anga hma la turin sorkar thuneitute an ngen a ni.