Rannnung thahna hlo hman dan zir

Agriculture department leh Central YMA chuan nimin khan Agriculture Conference Hall-ah rannung thahna hlo leh hnimhnah suatna hlo túr hman dan dik leh him zawk inzirtirna, 'Awareness campaign on safe & judicious use of pesticides programme' an buatsaih a, Agriculture minister KS Thanga'n a hmanpui.

KS Thanga chuan, mihring pung zelah ei leh bâr mamawhna a sang zel a, Mizoramah pawh ei leh bara intodelh tumin theihtawp chhuah mek a nih thu a sawi a," Mizoram mipui 70% aia tam eizawnna agriculture sector hi sorkarin a ngai pawimawh chhunzawm zel a; kut hnathawktute tihhmasawn te, an intodelh dan tur ngaihtuahpui leh an thawh chhuah tihpunsak hi kan development policy lian ber pakhat a ni reng a ni," a ti.

Agriculture (Crop Hus­bandry) director J Lal­zamliana chuan, Mizo­te'n túr hrim hrim an basa ngam nia sawiin, "Lui sangha leh nungcha te, savate leh ransate chenin chemical túr leh hnimhnah aṭanga túr sâwr chhuahte hmangin kan ei atan kan hrâi duh ṭhin. Ramhmul túr - rù leh thil dangte pawh hi nungchate'n an thihpui chuan mihring tan pawh a pawi tih kan hriat a ngai. A nihna takah chuan, mahni inhrâi duh khawpin kan fimkhur lo a ni," a ti.

CYMA president Vanlalruata pawhin thu sawiin, "Mizo mipui tlemtê, nuai 12 chuang âwrh hi kum tin cancer vang ringawtin mi 700 chuang kan thi ziah a, kan pun chak loh tehlul nen, kum khat chhunga kan thi nasa lutukte hi kan inzirchian deuh chu a ngai a ni," a ti a; chawhmeh châwk luhte bakah, huan thlaite chenin cancer thlen thei hman phal loh zinga mi pesticide hmanga enkawlte a ni em tih chian a ngaih thu a sawi.

Campaign-ah hian YMA hruaitute leh thlai tichhe thei thahna hlo zuartute an tel a, mithiamte'n thil pawi­mawh hrang hrang an zirtir a ni.