Vawiinah HSSLC exam buatsaih dawn Fimkhur takin kalpui kan tum - MBSE
Mizoram Board of School Education (MBSE) chuan vawiin hian Covid-19 vanga zawh hman loh Higher Secondary School Leaving Certifcate (HSSLC) Examinations 2020 leh High School Leaving Certifcate (HSLC) 2020 compartmental exam an buatsaih dawn. MBSE chairman F Lianhmingthanga chuan, exam chu fimkhur taka kalpui a nih tur thu a sawi.
Covid-19 vang hian HSSLC exam kal lai tihtawp a ni a; economics, chemistry, sociology, computer science leh home science subject latute an exam zo hman lo. Exam hmachhawn turte chu economics-ah zirlai 2,662, chemistry-ah 2,277, sociology-ah 1,641, computer science-ah 184 leh home science-ah 262 an ni a, exam nan centre 85 ruahman a ni.
Vawiinah economic leh chemistry subject late an exam dawn a, naktukah sociology late exam-in, Zirtawpni-ah computer science leh home science late an exam leh ang. Vawiin vek hian MBSE chuan district headquarters tinah HSLC compartmental examination a buatsaih dawn a, exam tura form fill-up zawng zawng chu mi 142 an ni.
Vanglaini palai zawhna chhangin MBSE Chairman chuan, exam chu fimkhur taka buatsaih tum a nih thu a sawi a, "Ministry of Home Affairs-in inkaihhruaina dan a siamte ṭha taka zawm tum a ni. Zirlaite tan exam hall-ah mask leh hand sanitiser ken luh phal a ni ang. Hall an luh hma hian thermal scanner hmangin endik vek a ni dawn," a ti. F Lianhmingthanga chuan, zirlai exam lo an awm lohna turin ruahmanna an siam thu sawiin, "Veivahna lama harsatna neite pawh an awmna hmun aṭanga exam centre hnai bera an exam theih nan inhriattir tura tih an ni a, mi 500 chuang an rawn inhriattir," a ti a; science subject awm lohna hmunah pawh science late an exam theih nan question paper sem chhuah a nih thu a sawi.