Hripui vei 151 zinga 134 an fihlim ta Enkawlna aṭangin mi 122 chhuak tawh

June 29, Thawhṭan­nia ZMC Covid-19 La­boratory-a swab sample endik zingah Covid-19 hripui vei hmuh an awm lo a, hripui vei endik nawnnaah mi pariatin an vei tawh lo tih finfiah a ni thung. Nimin khan hripui vei tawh lo mi 61-te chu enkawl an nihna hmun aṭang­in chhuahtir an ni. Mizo­rama Covid-19 vei zinga 122 chu chhuahtir an ni tawh a, vei tawh lo la enkawl mek mi 12 awmin, Covid-19 vei mek mi 17 an awm.

Sorkar thuchhuah tarlan danin, Lunglei district mi Covid-19 vei zinga vei tawh lo tih finfiah tawh mi 46 zinga 45 chu nimin khan chhuahtir an ni a, pakhat a la chhuak lo a, vei mek pakhat a la awm. State Referral Hospital (ZMC)-a hripui vei enkawl zinga mi pariat - Aizawl district mi pasarih leh Kolasib district mi pakhatte chu nimin khan chhuahtir an ni a, Mamita Dedicated Covid Health Centre (DCHC)-a enkawl mi pariat chhuahtir an ni bawk.

Nimina Lunglei district CCC leh DCHC aṭangin chhuahtirte hi mipa 29 leh hmeichhia 16 an ni a, Mamit district aṭanga chhuahtirte chu mipa leh hmeichhia pali ve ve an ni. Mizorama Covid-19 vei hmuh chhuah tawh mi 151 zinga 134 chuan an vei tawh lo tih finfiah a ni tawh a, chu chu vei tawh zat aṭangin 88.74% a tling. Hripui vei mek mi 17 an la awm a, chu chu 11.26% a ni. Covid-19 vei tawh lo finfiah tawh mi 134 zinga 122 (80.79%) chu chhuahtir an ni tawh a; mi 12 chu Covid Care Centre (CCC) / DCHC-ah an la awm a, Lunglei district-ah pakhat, Serchhip district-ah pahnih, Mamit district-ah paruk leh Champhai district-ah pathum an awm.

Hripui vei dama chhuah­tir tawh 122-te chu - Aizawl district-ah mi 31, Lunglei-ah 45, Siaha-ah pariat, Cham­phaiah panga, Kolasib-ah 11, Serchhipah pakhat, Lawng­­tlaiah pariat, Mamit­ah pakua, Saitualah pathum leh Khaw­zawlah pakhat an ni. Hnahthial district-ah tun thlengin hripui vei hmuh chhuah an la awm lo a; district dang pali - Kolasib, Serchhip, Lawngtlai leh Saitual district-ahte vei an awm tawh lo. June 29, Thawhṭannia ZMC Laboratory-a Covid-19 positive sam­ple ennawn zingah Mamit district aṭanga mi paruk sample thawn zinga pangate an nega­tive (vei tawh lo) a, pakhat erawh chuan a la vei thung. Cham­phai district-a positive pali zinga pathumin an vei tawh lo a, mi pathumte chu DCHC-a recovery ward-ah sawn nghal an ni. Lunglei dis­trict-a mi pakhatin a vei tawh lo tih finfiah a ni bawk.

Covid-19: Mizoram dinhmun

(June 30, 2020. 5:00 P.M)

District    Positive    Positive    Negative    Chhuak

    tawh zat    mek zat    leh tawh    tawh

Aizawl    38    7    31    31

Lunglei    47    1    46    45

Siaha    9    1    8    8

Champhai    9    1    8    5

Kolasib    11    -    11    11

Serchhip    3    -    3    1

Lawngtlai    8    -    8    8

Mamit    20    5    15    9

Saitual    3    -    3    3

Khawzawl    3    2    1    1

Hnahthial    Nil    -    -    -

Total    151    17    134    122