Serchhip Ṭhalai Pawlin Nu leh nausén thihna chhui turin ngen

Tun hnaia Serchhip District Hospital-a nausen piang hlim thihna leh raicheha nu thihna chungchang chhui chiang turin Serchhip Ṭhalai Pawl chuan nimin khan Health minister Dr R Lalthangliana, bialtu MLA Lalduhoma leh Serchhip DC-te hnenah ngenna an thlen.

Serchhip Ṭhalai Pawl (SṬP) tarlan danin, October 29, 2021 tlai dar 3:30 khan Vanlaldinpuii w/o Robert K Vanlalchhuanga, Sialsir-in Serchhip District Hospital-a naute a hrin chu a tûk October 30 zan dar 8:30-ah a thi. Nausen thi hi damdawi-ina thawktute'n an ngaihsak ṭha tâwk lo nia an hriat thu, a chhungte'n an thehdarh bakah, nausen na tuar lai video social media-ah thehdarh a ni.

Hetih lai hian, nausen thih dan chungchangah Serchhip District Hospital-a thawktute intél khawm chuan press release siamin, insawifiahna an tichhuak a, tih dik loh an neih loh thu an tarlang.

Sialsir nausén thih aṭanga ni 34-na, December 3, 2021 zan khan Serchhip District Hospital-ah vêk Malsawmkimi w/o Zaithankima, Tlangpui khua chu damdawi-inah nau chungah a thi a, a nau hrin a thi bawk. He thihna thlen chungchangah hian mitthi chhungte chuan thawktute inthlahdah vangah ngaiin, an rilru a nat thu an sawi a ni.

SṬP chuan, sorkarin nausén thihna leh nau chunga thihna a thlen lohna tura sum tam tak sénga programme a kalpui mek laia inhnaih taka ṭum hnih ngawt Serchhip District Hospital-a thihna thleng leh mi pathum an thi chu pawi an tih thu an tarlang a, "Serchhip tan pawh a mualphothlak mai bakah, Serchhip leh a chhehvel mipui rilruah District Hospital hi innghahna tlak loha ngaihna a lian ta hle," an ti.

“Serchhipa sorkar damdawi-in kan neih chhunin dem a kái leh mipuite’n an ring zo tawh lo tur hi a pawi kan tiin, ṭha lo kan ti tak zet. Mipui harsa leh rethei zawkte harsatna tam tak thlentu tur a ni dawn a ni,” tiin SṬP chuan, District Hospital chu innghahna tlak leh damlo tan pan tlak nia mipuiin an ngaih leh theihna turin tun hnaia thil thlengte chu chhui chian a ṭul tak zeta an hriat thu an tarlang.

Serchhip District Hospital-a nausen pahnih leh nu pakhat thihna chungchangah thil thlen dan dik tak chhui chianga hma la turin SṬP chuan nimin khan Health Minister-ah lehkha an thawn a, a ṭul anga chhui tura ngenna Serchhip DC hnenah an thlen bawk. An lehkha copy-te chu bialtu MLA hnenah an pe bawk a ni.