Remna Ni-ah mipui chibai kan bûk - MPCC

Mizoram Pradesh Congress Committee (MPCC) chuan thuchhuah siamin, Congress party-in Mizoram mipui zawng zawng Remna Ni chibai an bûk a, zalenna sualtu hnam sipaite leh remna siamtu zawng zawngte zahna chibai an bûk tih an tarlang.

MPCC chuan, Remna Ni-ah Mizo­ram zalenna atana nunna hlântu leh hnam sipai zawng zawngte zahna chibai an bûk tih sawiin, "Zalenna sual chhuah ni ta lo mah se, ram tana an inpekna ropui takte kha Mizoram mipuite'n kan hriat reng kan duh tak meuh. Inremna neih theih nana thâ thawhtu zawng zawngte kan ngaihluin zahna chibai kan bûk a ni," an ti.

Congress party chuan, kum 20 chhung Mizoram a buai a, chumi avang chuan mi tam tak an thih bakah thisen tam tak a luang tih sawiin, "Rambuai vangin Mizoramin harsatna chi hrang hrang kan tâwk nasa hle. Remna siam tumin kum eng emaw zat hmalak a ni ṭhin a, July 1, 1976 khan MNF president Pu Laldenga leh Union Home secretary SL Khurana ten inremna hmasa an ziak tawh," an ti a; mahse, inremna hmasa zawk chu a hlawhtling ta lo tih an sawi.

Remna zawnga inbiak laia Mizoram chief minister Lal Thanhawla'n remna neihna tur a nih avangin CM nihna chu MNF president Laldenga a ken avangin June 30, 1986-ah inremna ziah a ni tih sawiin MPCC chuan, "Mizoramah remna leh muanna tluantling a awm thei ta. Pu Lal Thanhawla'n CM nihna a kian hi India sorkar leh MNF-te inrem theihna atana thil pawimawh ber pakhat a ni a, a hre chiang apiangin ropui an ti em em a ni," an ti.