Mizoram sorkarin officer pension tawh mi paruk a ruai nawn mek
Mizoram sorkar chuan sorkar hnathawk, officer pension tawh mi paruk a ruai nawn mek a, chu'ngte chu Mizo pathum leh hnam dang pathum an ni. Pension tawh rawih nawnte chu Swamy's Complete Manual on Establishment and Administration hnuaia Chapter 42-nain a sawi anga rawih nawn a nih thu DPAR chuan a tarlang.
Vanglaini-in RTI Act hmanga a zawhna Department of Personnel and Administrative reforms (DPAR) SPIO-in a chhan danin, Mizoram sorkarin sorkar hnathawh pension tawh a rawih nawn mekte chu - RL Rinawma, IRS (Rtd.), PC Lallawmsanga, IPS (Rtd.), Lalmalsawma, MFAS (Rtd.), SH Lasker, AK Roy leh Shershing Thapa, MPS (Rtd.) te an ni.
RL Rinawma chu principal adviser to chief minister-ah dah a ni a, principal secretary rank a ni. Sorkarin lirthei pakhat leh driver a pe a, chu chu official duty-a hman tur a ni a, official duty-a a zinnaah thlawhnaa zinna leh TA/DA chu group-A officer anga pek phalsak a ni. In lamah muster roll (MR) pakhat a kawl phalsak a ni bawk.
PC Lallawmsanga pawh Disaster Management & Rehabilitation (DMR) department-ah consultant atan sorkarin a ruai nawn mek a, principal secretary rank a ni. Sorkarin hamṭhatna a pekte chu RL Rinawma nen a inang tlangpui. PC Lallawmsanga National Disaster Management Authority-a detailed project report (DPR) siam tura tih a nih bakah, sorkarin ṭul bik atana a chhawr a nih thu DPAR chuan a tarlang.
RL Rinawma leh PC Lallawmsanga te hi sorkar aṭanga a pension hlawh chuan sorkara rawih nawn a nihnaa a hlawh lak a tibuai lo a, thla khatah hlawh/lawmman Rs. 30,000 pek an ni a; sorkarin a rawih nawnna chu a titawp dawn a nih chuan a hma thla khatah hriattir tur a ni.
Lalmalsawma, MFAS (Rtd) chu sorkarin a rawih nawnnaah hian Secretary, 15th. Finance Commission Cell-ah a dah a, Mizoram sorkara secretary rank pek a ni. A hlawh (lawmman) chu CCS (Fixation of Pay of Re-employed Pensioners) Order, 1986 anga pek a ni a, a zat tarlan a ni lo. A chunga principal secretary rank-a rawih nawnte ang chiahin hamṭhatna chi hrang hrang pek a ni.
DPAR (GSW)-in a pawmpui angin Shershing Thapa chu Anti Corruption Bureau (ACB)-ah additional SP-a thla thum chhung atan a service pawhseisak a nih hnuah thla ruk dang atan pawhsei a ni a; service pawhseisak a niha a awmna chu ACB (Vigilance department) a ni.
SH Laskar chu DPAR pawmpui angin Guwahati Mizoram House-ah OSD atan rawih nawn a ni a, March 1, 2018 aṭanga thla ruk chhung atan rawih nawn a ni. AK Roy pawh Mizoram House, Kolkata-ah OSD atan rawih nawn a ni a, ani hi kum khat chhung atan a ni thung. SH Laskar leh AK Roy-te hi General Administration Department (GAD) hnuaia thawk an ni.