Rs. 5,07,52,310 hû ruihhlo hâl a ni

Central YMA hnuaia ruihhlo dotu, Supply Reduction Service (SRS) batch 6-nain ruihhlo an man chi hrang hrang, Rs. 5,07,52,310 hû chu July 14, Inrinni zing khan CYMA pisa kawtah Social Welfare minister PC Lalthanliana'n a hâl ral.

Ruihhlo hàl hmaa inkhawmah PC Lalthanliana chuan, sorkarin ruihhlo do a ngai pawimawh hle nia sawiin, Chief Minister kaihhruaina hnuaia ruihhlo dotu pawl an din, Core Committee hmalakna atan sorkarin cheng nuai 200 a dah tih a sawi a; Social Welfare Minister a nih angin ruihhlo leh a kaihnawih dona tur, The Mizoram Drugs Controlled Substances Rules chu Assembly House-ah a put luh thu sawiin, "He dan hi a taka hman mek a ni," a ti.

Social Welfare Minister chuan, YMA chu Mizote himna kulhpui a ni tih sawiin, "YMA-in ruihhlo a dona kawngah dan ang lo deuha thil tih a ngaih cháng a awm lo thei lo. SRS-in damdawi a man khawmte hâl ral a nih rual hian, damdawite hi a rêm mai dawn lo a, a dona kawngah thâ thlah loa ṭan lak chhunzawm zel a ngai dawn a ni," a ti a; damdawi ruihhlote chu páwl mai ni lo, mimal tinin an do a ṭul tak zet tih a sawi.

CYMA president Vanlalruata chuan, YMA-in ruihhlo a do ringawt chu dan mit aṭanga thlir chuan an tling lo hle tih an hria nia sawiin, "Hetiang hi ni mah se, ruihhlo do hi ramin a mamawhna a nasat avangin ti lo thei lo din­hmunah kan ding a ni. Tute pawhin engtiang pawhin sawi mah se, chhanchhuah ngaite chhan­chhuak turin YMA chuan hma a la chhunzawm zel dawn," a ti.

Vanlalruata chuan, sorkarin police leh sipai sing têl an nei reng chunga ruihhlo do kawnga thâ thlah loa ṭan a ngai reng chu manganthlak a tih thu sawiin, "Mizoram hian eng ang takin nge natna a vei tih leh, chumi aṭanga chhanchhuak tur chuan engtin nge hmalak a nih ang tih hi tih tak zeta min ngaihtuahpuitu kan mamawh hle a ni," a ti a; ruihhlo do hi YMA chakna ringawta hneh chi a nih loh avangin, sor­kar leh kohhran nen ṭang tlanga hmalak a ṭul thu a sawi bawk.

Inrinni zinga SRS ruihhlo man hâl tâkte hi heroin hawng 183, can 958 leh chhinsen 89, Addnok tlêp 12, ganja kg. 12 leh fûn 178, Alprozelum mûm 5,920, khuh damdawi bûr 2,252 leh tlêp 10 leh, Trama báwm pariat a ni a; tualchhunga hralhna anga chhûtin Rs. 5,07,52,310 hû a ni.

Ruihhlo hâl takte kaih­hnawihah hian mi 772 man an ni a, chu'ng zinga 40 chu home/centre-ah dah niin, Excise & Narcotics-ah mi 25 leh Police-ah mi pathum an hlan a, mi 275 chu counselling pek an ni.

SRS batch 6-na hian dan loa tawlhrûk rangkachak kg. 13, cheng nuai 416 hû an man bawk a, a kaihhnawiha mi an mante chu Police leh Revenue Intelligence hnenah an hlan a ni.