Gorkha-te'n Bhanu Jayanti an lawm

Central Mizoram Gorkha Youth Association (Central MGYA) huaihawtin Aizawla Gorkha-te chuan an hnam zinga thu leh hla lama puipa bera ngaih, Adikavi Bhanubhakta Acharya pian champha vawi 204-na, Bhanu Jayanti chu July 13, 2018 khan Vanapa Hall-ah an lâwm a; Mizoram Gorkha Sangh president HB Thapa khuallian a ni.

Bhanu Jayanti lawmnaah hian Adikavi Bhanubhakta Acharya thu­ziahte zirho a ni a, Gorkha hnam zai leh làm chi hrang hrang entir a nih bakah, Gorkha zirlai ti ṭhate an chawimawi bawk. Bhanu Jayanti pualin July 7, 2018 khan Gorkha School, Khatlaah Sahitya Gosthi an lo hmang tawh a, Adikavi Bhanubhakta Acharya chanchin an zir bakah, naupangte tan talent show, essay writing competition leh sketching competition-te an buatsaih a ni.

MGYA hi Mizorama Gorkha-te tlawmngai pawl lian ber a ni a, kum 1976 khan din a ni. Bhanu Jayanti hi Kolasib, Lung­lei, Saiha leh Bualpuiahte MGYA branch-te'n an hmang bawk.

Adikavi Bhanubhakta Acharya hi Nepal rama Tanahu district-a Chundi Ramgha khuaah kum 1814-ah a piang a, thu leh hla lamah hnutchhiah tam tak a neih rualin, khawvel­in a hriat lârna ber chu Hindu sakhaw lehkhabu, Ramayana, Sanskrit ṭawng aṭanga Gorkhali ṭawnga a lehlin vang a ni.