Thlai suamsamtu hrem an phût

Chuhvel Joint NGO chuan thuchhuah siamin, July 9, 2018 tlaia Chuhvel khaw ram chhung, Saikah muala kuhva leh thlai/thei dang awmte Zamuang khaw mi ṭhenkhatin an suamsam chu an dem thu an tarlang a; a titute man a, a na thei ang bera hrem an phût thu an sawi.

YMA, MHIP leh MUP telna Chuhvel Joint NGO tarlan danin, an khaw ram, Saikah muala kuhva kûng 25,000 bakah, buh leh bâl leh thlai dangte chu Zamuang khaw mi ṭhenkhatin an tichhia a, thlám pali an hâl bawk. Hei vang hian Chuhvel Joint NGO chuan a titute hrem ngei an phût bakah, kuhva leh thlai dang tihchhiat neitute hnenah zângnadawmna a rang lama ngaihtuahsak turin sorkar an phût a ni.