Lottery cancel kan phût - Tlanghmingthanga
MNF vice president R Tlanghmingthanga chuan, Mizoram lottery chungchanga hmingchhiat thupbo nan Congress party-in dâwt phuahchawp an vawrh darh niin a sawi a, lottery chu suspend chauh ni loin, cancel an phût thu a sawi.
R Tlanghmingthanga hian July 13, 2018-a Mizo Hnam Rûna inkhawmah thu sawiin, lottery chungchanga MNF dinna chu, dik lo taka loterry distributor-te hun pawhsei leh chu suspend mai ni loin, cancel nghal an phût thu a sawi a, "Tender maksak tak mai, anmahni duhsak bikte chauhin an chhan theih tura an siam hi cancel a, a thara tender chhuah leh kan phût bawk. Kan phûtte hi tihlawhtling turin a tàwp thlengin MNF chu kan kal dawn a ni," a ti.
MNF sorkar laia lottery kalpui danah CBI emaw, a aia corruption chhuitu lian pawhin chhui dawn se, an cho hle tih sawiin Tlanghmingthanga chuan, "CM Pu Hawla hnenah pawh kan hun lai aṭangin chhuitir rawh u, kan ti chungin tun thlengin chhuitir turin hma a la ngam lo tih hi Zoram mipui hriatah kan puang nawn leh duh a ni," a ti a; tuna taka thil tih dik loh awm ve anga Congress party-in an sawi thar leh chu dâwt phuahchawp niin a sawi.