Lok Adalat-ah thubuai 330 chingfel
Mizoram State Legal Services Authority (MSLSA) ruahmannain July 14, Inrinni khan MSLSA pisa leh district hrang hranga District Legal Services Authority-te'n National Lok Adalat an nei a; ngaihtuah turin thubuai 1,337 a awm a, chu'ng zinga 330 chu chinfel a ni.
Lok Adalat-a thubuai ngaihtuah tlangpui chu - bank-a leiba thubuai, pawisa inpûk thubuai, civil suit, chhungkaw thubuai, ramri buai chungchang, intihhmingchhiatna thubuaite a ni a; inremsiamna hmangin thubuai eng emaw zat chinfel niin, thubuai chinfela sum chinfel zat belhkhawm chu Rs. 1,91,63,466 a tling.
National Lok Adalat hi Aizawlah chuan MSLSA member secretary Vanlalenmawia hoin mi 16-in bench pangaah an ngaihtuah a ni a; district khawpuiahte pawh District Legal Services Authority (DLSA) hotute leh DLSA-a tel páwn lam mite'n an ngaihtuah a ni.
Lok Adalat hi Court-a thubuai kalpui a nih hma pawhin dan lama harsatna neite'n an thubuai chinfelna atan an hmang thei a, Court-a thubuai inchiah mekah pawh hman ṭangkai theih a ni. Lok Adalat hi thla tin neih ṭhin a ni a, Court-a thubuai neite tan pan theih reng an ni.