KHAWTHLIR

State Referral Hospital (SRH)-ah Covid-19 hripui vei mi pasarih enkawl mek an ni a, Isolation Ward-ah an awm tih SRH-ZMC Bulletin chuan a tarlang. Hripui vei rinhlelh thilah nimin khan mi pathum dah luh thar an ni a, anni leh June 29-a rinhlelh thilah dah luh mi pahnihte nen nimin khan an swab sample endik nghal a ni a, result hriat hman a ni lo.

Aizawl South-I bialtu MLA C Lalsawivunga chuan June 29, Thawhṭanni khan tun hnaia lirnghingin a sâwi nat khua zinga mi Leithûm leh Khuanglengte a tlawh a, khawtlang hruaitute nen inkâwmin, ṭanpuina pawisa leh hmanrua ṭhenkhat a pe. C Lalsawivunga hian a hmain Khawbung, Zawlsei, Khuangthing, Dungtlang, Samthang, Farkawn leh Vaphai-te a lo tlawh tawh bawk.

Kolasib DC Dr H Lalthlangliana chuan thupek chhuahin, Assam, Arunachal Pradesh leh Myanmar-ah vawk natna African Swine Fever (ASF) a lèn avangin, ram dang leh state dang aṭanga vawk, vawksa leh vawksate Kolasib district chhunga lak luh a khap a, "Vawk thi reng reng phûm tur a ni a, vawk talhtute'n vawk hrisel ṭha chauh an talh tur a ni," a ti. Thupek hian thla hnih chhung a huam ang.

Minister R Lalzirliana chuan, Thawhṭannia a bial chhung Tuikhurhlu khuaa chenna in kâng neitu Vanlalthlana te chhungkua a tlawh a, ṭan­­puina pein, a theih ang anga ṭanpui tura a inpeih thu a hrilh. Vanlalthlana nupui Liansangi hi an khaw MHIP treasurer a ni a, an chhungkaw pawisa bakah MHIP sum leh buhfaiṭham hralhna sumte nen pawisa fai Rs. 1,00,000 chuang hret a kâng ral a ni.

Covid-19 hripui laka inven nan Lunglei district-ah nimin chhun dar 12 thleng khan khung hran (quarantine) mi 76 an awm mek. Khung hrante hi sorkar quarantine facility, DCHC leh CCC-ah mi 62, community quarantine facility-ah mi pahnih leh mahni inah (home quarantine) mi 12 an awm a ni. Champhai district-ah khung hran mek mi 25 an awm bawk a, mipa 18 leh hmeichhia pasarih an ni.