Mizoram-Bangladesh ramri vengtute Group YMA-in an ko haw dawn

India leh Bangladesh inrina dep, Tlabung leh a chhehvel venga rammu YMA duty-te chu duty tura ruahmanna siamtu Khawthlangtuipui Group YMA chuan koh haw rih an rêl.

June 29, Thawhṭanni zana Khawthlangtuipui Group YMA hruaitute ṭhukhawm chuan, riah chilha ramri vên chu an rua­hman chin a zawh tâk avang­in an kal zel dan tur an rél a; an huam chhunga YMA branch hrang hrang tirha ramria riak mekte chu a thlâkna tur rua­hmanna dang siam a nih hma loh chuan koh haw rih phawt an rêl a ni.

Khawthlangtuipui Group YMA hruaitute chuan, ramri an vèn chhungin sum bakah thilpek dang petute zawng zawng leh anmahni thláwp tlattute chungah an lawm hle tih an sawi a; tuna an sum leh pai dinhmun te, an laka sorkar thuneitute sûkthlêkte ngaihtuahin, ramri vénga riah chilh zel chu ṭûl an tihpui vak tawh lo nia an hriat avangin ramri riah chilha ven chu tihtawp rih loh theih loh nia an hriat thu leh, ramri vèn zel erawh chu a la ṭul hlea an hriat thu an sawi bawk.

Tlabung aṭanga thu dawn danin, Mizoram leh Bangladesh ramri-ah hian thla hnih chhung chàwl loin Khawthlangtuipui Group YMA hmalaknain hmun 10 velah riahbûk sualin ramri ven a ni. Ramri venga riah chilh a nih hnuah May 29, 2020-a minister K Lalrinliana'n a tlawh bak chu sorkar mi pawimawh dangin an tlawh lo a, an chanchin ngaihven a ni lo tih thu dawnna chuan a sawi.