PHE-in JJM chungchang sawifiah
PHE department chuan thuchhuah siamin, tun hnaiah chanchinbu ṭhenkhatah sorkar laipuiin thingtlang khuaa in zawng zawnga tui connection pek vek a tumna programme Jal Jeevan Mission (JJM) chungchang an sawifiah a, "Hetah hian thu hriatfiah tâwk loh deuhte a awm theih avangin mipuite'n thu chiang lehzual an hriat theihna atan thuchhuah siam a ni," an ti.
March 2020 aṭangin khawvel pumah Covid-19 a lên avangin hnathawh chak a har thu tarlangin PHE chuan, "State tam takah hna a châwl a, central sorkar pawh a mangang a ni. June thla tìr aṭang khan Mizoram chauh ni loin state hrang hrang chief minister-te lehkha an thawn chhuak a ni. Mizoramah chuan hri léng karah hna thawh hrâm hrâm a ni a, April - May chhung hian tui connection 2,129 pek a ni. Kumin 2020-21 atana target chu tui connection 31,963 a ni a, hripui karah pawh zawh ngei tum a ni," an ti.
PHE press release-in a tarlante
Independence Day, August 15, 2019 khan PM Narendra Modi chuan India thingtlang khuaa in zawng zawngte tui connection pek vekna tur programme JJM a puang. PM chuan, kum 70 chhung tih theih loh kha kum nga chhunga tih kan tum tiin chhuang takin a sawi.
State hrang hrangte chu hma la nghal tura hriattir an ni chungin, guidelines a awm rih loh avangin tu mahin hma an la thei lo a, December 25, 2019-ah guidelines a chhuak chauh. Guidelines-ah chuan kum 2019-20 chhungin 30% tui connection pek hman tura a ni a, Mizoram target chu in 23,525 a ni. Heti zat connection pe tur hian cheng vbc. 88.00 mamawh a ni a, sorkar laipuiin 2019-20 atana a ruahman chu vbc. 39.86 chauh a ni.
Hna hi a hmanhmawh thlak dawn tih hriat a nih avangin guidelines chhuah hma pawhin Mizoram sorkar chu fund lo kal ve leh hna ṭan nghal turin a inbuatsaih. December 2019 chhung khan central fund cheng vbc. 39.86 hmuh hman a ni a, he sum hmang hian January-March 2020 chhung khan thingtlang khuaah tui connection pek char char niin, in 15,878 pek hman a ni.
JJM tipuitling tur hian Mizoram chuan India state tam tak aiin hma a la chak a, hei vang hian 26.3.2020 khan kum 2019-20 atana allocation bakah thawh chak lehzual beiseina incentive cheng vbc. 28.18 min pek belh. Hei hi financial year tàwp rêta pek a nih avangin 2020-21 opening balance-ah dah a ni.
Mizoram sorkar hnathawhah central lam a lâwm avangin kum 2020-21 atana sum allocate chu kum hmasa lêta tihpun a ni a, cheng vbc. 79.72 dah a ni.
A tìrtê aṭangin central sorkarin Mizoram sorkar chungah beiseina sang tak an neih thu an sawi chàmchí a ni. India ram pumpui target kum 2024 thleng a nih laiin, Mizoram chuan kum 2022-ah in zo vek thei ang an ti. Mizoram sorkar tan a huphurhawm ve avangin kum 2023-ah zawh tum a ni tih sorkar laipui hriattir a ni.