NEET-ah Mizorama ti ṭha ber Chakma Mizoram top 10-ah Chakma 3 an awm

India rama medical course hrang hrang zir tur thlanna, National Eligibility cum Entrance Test (NEET) 2018-ah Mizoram aṭanga exam zingah Sujan Chakma s/o Sinity Kumar Chakma chu a ti ṭha ber a ni a, a ti ṭha zual 10 zingah Chakma pathum an awm. Medical course zir tur thlanna, counselling chu tunlai hian tih mek a ni. Hetih lai hian, Central pool-a Mizoramin MBBS leh BDS seat a neih zat tur hriat a la ni lo.

Higher & Technical Education depart­ment-a Technical Wing hotute hnen aṭanga thu dawn danin, kumin NEET-ah hian candidate nuai 13 chuang an awm a, Mizoram aṭang pawhin mi sang chuang féin an hmachhawn a ni.

NEET 2018 tesult tihchhuah tâkah Mizoram aṭanga exam zingah Sujan Chakma chu a ti ṭha ber, pakhatna a ni a; ani hi Schedule Tribe zingah India ram pumpuiah 869-na a nih laiin, all India ranking-ah chuan 86,919-na a ni. Mizoram aṭanga ti ṭha ber dawttu, pahnihna chu Lalbiakṭhuama a ni a, ani hi ST bikah 1,368-na niin, all India ranking-ah chuan 1,08,568 a ni thung.

NEET 2018-ah hian Mizoram aṭanga exam zinga a ti ṭha zual 100 zingah Chakma panga an awm a; chu'ngte chu a ti ṭha ber Sujan Chakma bakah, pariatna K Joseph Chakma (s/o Amir Baran Chakma), pakuana Nibir Chakma (s/o Joy Kumar Chakma), 51-na Daaba Chakma, 57-na Mini Chakma leh 85-na Jitesh Chakma te an ni. ST ranking bika 500-na chin chung lamah Chakma pasarih vel an awm bakah, 100-na chinah hian hnam dang pathum an awm bawk.

NEET-a tlingte medical course zir tur thlanna, counselling chu tunlai hian kalpui mek a ni a, counselling hi online hmangin June 23, 2018-ah ṭan a ni. HTE Technical Wing hotute chuan, counselling-ah hian zirlai eng emaw zatin an zir tur leh an zirna tur an thlang fel tawh a, chutih laiin, Central pool-a Mizoram quota neih zat tur leh seat neihna hmun turte hriat a la nih loh avangin tihfel vek theih a la ni lo tih an sawi.

Hetih lai hian, North Eastern Council (NEC) hnuaia Mizoramin MBBS leh BDS seat a neih zat tur erawh tihchian a ni tawh a; MBBS-ah hian Mizoram chuan kumin hian NEC hnuaiah seat 14 a nei dawn.

HTE Technical Wing hotute sawi danin, NEC hnuaia Mizoramin kumina MBBS seat a neih dan chu - Regional Institute of Medical Sciences (RIMS), Imphal-ah seat pasarih, North Eastern Indira Gandhi Regional Institute of Health and Medical Sciences (NEIGRIHMS), Shillong-ah seat pathum, Assam Medical College-ah seat pahnih leh Tripura Medical College-ah seat pahnih a ni. Hei bakah hian, Mizoram chuan Mizoram Institute of Medical Education and Research (MIMER)-ah seat 70 a nei bawk.

MIMER-ah hian MBBS seat 100 zinga 15 chu Non Resident Indian (NRI) tan hauh a ni a, chutih rualin, NEET 2018 paltlang a ngai ve tho a; kum tin US dollar 1,500 chawi ngai. Seat 15 dang chu India ram chhung hmun danga mite tan hauh a ni thung.